Հայաստանում գրանցված և հարկման բազա ունեցող աշխատատեղերի հարցում հերթական պատմական ռեկորդն ենք արձանագրել։ Այս մասին այսօր կառավարության նիստում հայտարարեց ՀՀ վարչապետ Նիկոլ Փաշինյանը։
Նրա խոսքով, ընթացիկ և նախորդ տարիների ցուցանիշների համաձայն, այս տարվա մայիսի արդյունքներով` ՀՀ–ում 718.266 գրանցված աշխատատեղ կա, 2018 թվականի մայիսի համեմատությամբ ցուցանիշն ավելացել է 170.277 աշխատատեղով։
Փաշինյանի դիտարկմամբ` աճ է գրանցվել ոչ միայն նախորդ տարվա մայիսի (40.323 դրամով կամ 17 տոկոսով), այլ նույնիսկ այս տարվա ապրիլի համեմատությամբ (4215 դրամով կամ 1.5 տոկոսով)։
«Նաև աշխատավարձի ֆոնդի շոշափելի աճ ունենք։ 2018 թվականի մայիսի համեմատ ՀՀ–ում աշխատավարձի ֆոնդը կրկնապատկվել է` ավելացել է 106,6 տոկոսով կամ 103 միլիարդ 40 միլիոն դրամով»,– նշեց Փաշինյանը՝ հավելելով, որ բարձրացել է նաև միջին աշխատավարձի ցուցանիշը` 2018 թվականի մայիսի համեմատությամբ 101.629 դրամով կամ 57,6 տոկոսով։
Կարդացեք նաև
«Սրանք կարևոր ցուցանիշներ են: Հայաստանում աշխատավարձը շարունակաբար բարձրանում է ու կարևոր է, որ գնաճի համեմատ՝ առաջանցիկ տեմպերով: 2022թ. տվյալներով՝ գնաճի էֆեկտը հանած՝ 6.3 տոկոսով աշխատավարձը Հայաստանում բարձրացել է, ինչը շատ կարևոր և էական ցուցանիշ է»,-ասաց Փաշինյանը:
Նա հավաստիացրեց, որ կառավարությունը պետք է հետևողականորեն շարունակի բարեփոխումների քաղաքականությունն իրականացնել բոլոր ոլորտներում:
Լուսինե ՄԱՐԳԱՐՅԱՆ
