Կենսաթոշակառուներին հետվճար տրամադրելու ժամկետի երկարաձգումն այսօր առիթ հանդիսացավ, որպեսզի ՀՀ վարչապետ Նիկոլ Փաշինյանը կառավարության նիստում մոտ 15 րոպե խոսի անկանխիկ եղանակով վճարումով գործարքներ կատարելու օգուտներից:
Փաշինյանը կարծում է, որ կենսաթոշակառուները ևս պետք է օգնեն կառավարությանը կոռուպցիայի դեմ պայքարում, որպեսզի էլ ավելի բարձրանան թոշակները։
«Մեր բյուջետային գործերը լավ են, մեր տնտեսական գործերը լավ են և այստեղ տրամաբանական հարց է ծագում, թե ինչու ենք երեք-երեք հազարական դրամներով բարձրացնում կենսաթոշակը: Պատճառը շատ պարզ է, որովհետև մի բան է 595 հազար մարդու համար նախատեսված գումար բարձրացնել, ուրիշ բան է բարձրացնել գումար, որը նախատեսված է հազար մարդու համար: Ընդ որում, թոշակ բարձրացնելիս՝ կառավարությունը պետք է հաշվարկի այնպես, որ ինքը առնվազն հավերժ այդքան թոշակ պետք է տա: Դա ծախս է, որից կառավարությունն այլևս երբեք չի կարող հրաժարվել: Կամ էլ ցնցումային տարբերակով դա հնարավոր կլինի: Սա նորմալ քաղաքականություն է»,-ասաց նա:
Փաշինյանը չի հասկանում բոլոր այն բանկերին, որոնք կառավարության սոցիալական ծրագրին չեն միացել և թոշակների տրամադրումն իրենց բանկերի միջոցով չեն անում։ «Անկեղծ ասած` չեմ հասկանում նրանց, որ սոցիալական պատասխանատվության այս թեմայից խուսափում են։ Մենք պետք է հաշվի առնենք արդեն ընկերությունների մասնակցությունը կառավարության սոցիալական ծրագրերին և այստեղ էլ որոշակի նկատառումներ անենք»։
Կարդացեք նաև
ՀՀ փոխվարչապետ Մհեր Գրիգորյանն էլ տեղեկացրեց, որ թոշակների ամսական հանրագումարի 25 տոկոսն արդեն անկանխիկ է վճարվում, ու դա ուղիղ ազդեցություն ունի նաև վարկերի տոկոսադրույքի վրա։
ՀՀ կենտրոնական բանկի փոխնախագահ Հովհաննես Խաչատրյանը վստահեցրեց` ամեն ինչ անելու են, որպեսզի բոլոր մյուս բանկերը ևս մասնակցեն թոշակների անկանխիկ վճարումների` կառավարության սոցիալական այս ծրագրին։ «Այս պահին անկանխիկ վճարումները պարտադրանք չեն համայնքների համար, սակայն առաջարկում ենք օրենքի ուժով այն դարձնել պարտադրանք։ Օրինակ` Երևանի քաղաքապետարանն այդ շոգեքարշի դերում է»,– նշեց Խաչատրյանը։
Լուսինե ՄԱՐԳԱՐՅԱՆ
