«Չեմ կարող համաձայնել պարոն Խաչատրյանի հետ, թե բյուջեում փող չկա, այս պահին մենք ունենք եկամուտների գերհավաքագրում, դրա փոխարեն՝ ծախսերի թերակատարում»,- այսօր ԱԺ ֆինանսավարկային եւ բյուջետային հարցերի մշտական հանձնաժողովի նիստում ասաց հանձնաժողովի նախագահ Գեւորգ Պապոյանը։
Ֆինանսների նախարարի տեղակալ Էդուարդ Հակոբյանը հանձնաժողովի նիստում ներկայացրեց Հայաստանի Հանրապետության եւ Վերակառուցման ու զարգացման միջազգային բանկի միջեւ «Կանաչ, դիմակայուն եւ ներառական զարգացման քաղաքականության վարկ» վարկային համաձայնագիրը վավերացնելու մասին նախագիծը, ըստ որի՝ կառավարությունը 92․3 մլն եվրո գումարի չափով բյուջետային աջակցության վարկ է վերցնելու։
«Փող կա, բայց վերջնարդյունքում այն ծրագրերի համար, որոնք մենք նախանշում ենք, ինչ-որ բան գուցե տարվա վերջին պակասի, եթե, իհարկե, հավաքագրման տեմպերը պլանով գնան եւ չգերակատարվեն։ Մեր պակասուրդն ավելի քիչ է, քան մեր կապիտալ ծախսերը, սա թերեւս ամենալավ հիմնավորումն է այս ամենի, որովհետեւ մեր եկամուտները մեր ընթացիկ ծախսերն ամբողջովին սպասարկում են, հետեւաբար, ընթացիկ ծախս սպասարկելու համար կարիք չունենք նման վարկեր վերցնելու։ Եթե այս վարկային միջոցները մենք չվերցվենք, հենց կապիտալ ծախսերն են տուժելու։ Մենք ունենք միջոցներ, դրանք ուղղում ենք մեր թոշակներին, աշխատավարձերին, ընթացիկ պարտավորությունների կատարմանը»,- ասաց Պապոյանը։
Էդուարդ Հակոբյանը, պատասխանելով հարցին, բյուջեում փող կա՞, թե՞ ոչ, ասաց․ «Ծախսերի հիմնական բեռը գալիս է տարվա երկրորդ կեսին, այսինքն՝ երրորդ, չորրորդ եռամսյակին: Դա է նպատակը, որ մենք հիմա քայլ ենք կատարում, որ այդ համարժեք ռեսուրսները լինեն, եւ մենք հիմա կարողանանք պատշաճ ձեւով իրականացնել այն բոլոր ծախսային ծրագրերը, որոնք կան»։
Կարդացեք նաև
Հանձնաժողովը դրական եզրակացություն տվեց վարկային համաձայնագիրը վավերացնելու նախագծին։ Գեւորգ Պապոյանն ասաց, որ ամենայն հավանականությամբ՝ առաջիկայում ԱԺ արտահերթ նստաշրջան կգումարվի, որի օրակարգում կընդգրկվի նաեւ այս նախագիծը։
Ռոզա ՀՈՎՀԱՆՆԻՍՅԱՆ
