«Մինչ մենք այստեղ գոյություն ունեցող խնդիրների լուծման մասին ենք մտածում, Ադրբեջանը հենց ժամեր առաջ կրակ է բացել Հայաստանում օտարերկրյա ներդրումների ներգրավմամբ այժմ կառուցվող մետալուրգիական գործարանի վրա»,- Եվրոպայի խորհրդի խորհրդարանական վեհաժողովի (ԵԽԽՎ) ամառային նստաշրջանի լիագումար նիստի ընթացքում հայտարարեց ԵԽԽՎ հայկական պատվիրակության անդամ Հռիփսիմե Գրիգորյանը։
Նա նշեց՝ ուշադրություն, սիրելի գործընկերներ, Ադրբեջանը կրակում է ոչ թե Լեռնային Ղարաբաղի վրա, այլ Հայաստանի․ «Մեկ շաբաթ առաջ՝ հունիսի 13-ին ադրբեջանական կողմը կրկին կրակ բացեց, որին նախորդել էին Հայաստանի հասցեին կեղծ մեղադրանքներ, մինչդեռ մենք հայտարարել ենք, որ գործարանի կառուցումը լիովին համապատասխանում է Հայաստանի միջազգային պարտավորություններին, և որ Ադրբեջանի կեղծ մտահոգությունները պարզապես ուղղված են Հայաստանի տնտեսական զարգացմանը և օտարերկրյա ներդրումները խոչընդոտելուն։ Դրա հետևանքով օտարերկրյա երկու քաղաքացիներ վիրավորում են ստացել։ Ադրբեջանը բացահայտ անտեսում է Հայաստանի տարածքային ամբողջականությունը, մարդու իրավունքները, միջազգային իրավունքը և պետք է արժանանա միջազգային հանրության ուշադրությանը։ Մենք պետք է քայլեր ձեռնարկենք զսպելու Ադրբեջանի առավելապաշտական նկրտումները և իրենց նպատակներին հասնելու համար ուժի կիրառման անընդունելի քաղաքականությունը։
Շրջակա միջավայրի պաշտպանությունը Ադրբեջանի կողմից օգտագործվեց, երբ ամիսներ առաջ Լաչինի միջանցքը շրջափակվեց այսպես կոչված բնապահպան-ակտիվիստների կողմից։ Եվ ի՞նչ կատարվեց իրենց բնապահպանական պահանջների հետ, որ նրանք դադարեցրին իրենց ցույցերը, երբ իրավական խախտումներով տեղադրվեց անցակետ Լաչինի միջանցքում։ Հունիսի 15-ին ադրբեջանական կողմն այլ սադրանքի դիմեց։ Մի խումբ ադրբեջանցի զինվորներ փորձեցին ադրբեջանական դրոշ տեղադրել ՀՀ տարածքում։ Տեղում կադրերից երևում է, որ նրանց ուղեկցել են ռուսական խաղաղապահ ուժերը։ Սա լուրջ խնդիր է։ Հայաստանը կոչ է արել հետաքննություն անցկացնել՝ հասկանալու այս սադրանքի հանգամանքները։ Այս սադրանքը որպես ալիբի օգտագործելով՝ Ադրբեջանն ամբողջությամբ փակել է միջանցքով երթևեկությունը։ Եթե նախկինում Միջազգային Կարմիր խաչը կարող էր շտապ սնունդ և դեղորայք տեղափոխել, հիմա երթևեկությունն ամբողջությամբ դադարեցված է։ Այսպիսով, մենք խոսում ենք ոչ թե հնարավոր հումանիտար ճգնաժամի մասին, այլ այն ճգնաժամի մասին, որը հնարավոր է շատ շուտով, եթե մենք քայլեր չձեռնարկենք»։
Հռիփսիմե Գրիգորյանը կարևորեց, որ նախագահական հանձնաժողովն այցելի Լաչինի միջանցք գնահատելու իրավիճակը տեղում․ «Մենք պետք է քայլեր ձեռնարկենք, ցույց տալու, որ մինչ Եվրոպայում, Ուկրաինայում պատերազմ է, ոչ մի երկիր չի կարող օգտվել առավելություններից և իրականացնել էթնիկ զտումներ բոլորիս փակ կամ զբաղված աչքերի ներքո: Մենք պետք է տեր կանգնենք մեր արժեքներին՝ պաշտպանելու մարդու իրավունքները, պաշտպանելու մարդկանց»։
Կարդացեք նաև
Տաթև ՀԱՐՈՒԹՅՈՒՆՅԱՆ
