Aravot.am-ի տեղեկություններով՝ հունիսի 1-ին Ոստիկանությունում «Հայաստանի խուլերի միավորում» ՀԿ նախկին և ներկայիս անդամներ՝ Ա.Ս-ն, Է. Ղ,-ն և Ս. Վ.-ն հայտնել են աշխատանքային շահագործման մասին տեղեկություններ: Մասնավորապես՝ Ա.Ս.-ն Է.Ղ.-ն նույնաբովանդակ հաղորդումներ են տվել, որ «Հայաստանի խուլերի միավորում» ՀԿ նախկին անդամներ՝ Ա.Մ.-ն , Հ, Ս.-ն 2021 թվականից Ա.Ս.-ին, իսկ 2022 թվականից Է.Ղ.-ին բռնություն գործադրելով կամ դրա գործադրելու սպառնալիքով, հարկադրանքի այլ ձևերով, վարկեր ձևակերպելով, պարտքային կախվածության մեջ գցելու միջոցով առաջացած վիճակի խոցելիությունն օգտագործելու եղանակով ստիպել են Երևան քաղաքի Կենտրոն վարչական շրջանի փողոցներում, զբաղվել ավտոմեքենաների կայանումը հսկելու ապօրինի գործով և վերցրել այդ ճանապարհով վաստակած ողջ գումարը կամ դրա մի մասը՝ այդպիսով նրանց ենթարկելով աշխատանքային շահագործման:
Միաժամանակ Ս.Վ.-ն հաղորդում է տվել, որ Վ. Ա.-ն անվտանգությունը ապահովելու կեղծ խոստումներով, խաբեությամբ և վստահությունը չարաշահելու, ինչպես նաև վիճակի խոցելիությունը օգտագործելու եղանակով ստիպել է իրեն Երևան քաղաքի Կենտրոն վարչական շրջանի փողոցներում զբաղվել ավտոմեքենաների կայանումը հսկելու ապօրինի գործով և յուրաքանչյուր օր վերցրել այդ ճանապարհով վաստակած գումարի մի մասը, իսկ Ա.Մ.-ն խաբեությամբ վարկեր ձևակերպելով պարտքային կախվածության մեջ է գցել Ս.Վ.-ին, ինչը ստիպված մարում է ինքը հիշյալ աշխատանքով ստացված իր մոտ մնացած գումարով:
«Հաղորդումը ոստիկանությունից ստացվել է քննչական կոմիտե, նախաձեռնվել է քրեական վարույթ, իրականացվում է նախաքննություն: Պլանավորվել են կոնկրետ գործողություններ, սակայն ելնելով քրեական վարույթի նախաքննության շահերից, չվնասելու համար այդ գործողությունների արդյունքներին, այս պահին ձեռնպահ ենք մնում դրա վերբերյալ որեւէ տեղեկատվություն տրամադրելուց»,- Aravot.am-ին ասաց Քննչական կոմիտեի նախագահի մամուլի քարտուղար Գոռ Աբրահամյանը:
Արփինե ՍԻՄՈՆՅԱՆ
