Երեւանի ընդհանուր իրավասության դատարանի Շենգավիթ նստավայրում այսօր շարունակվեց «Ցորի» զորամասի հրետանային դիվիզիոնի գործով դատը: Այսօր դատարանում հարցաքննվեց առանցքային վկա, սպա Արիկ Գոքորյանը: Նիստի ժամանակ կրքերը բորբոքվեցին:
Գեւորգ Գեւորգյանի պաշտպանի կարծիքով, զոհվածների իրավահաջորդների ներկայացուցիչը կիրառում է մարտավարություն, ըստ որի հարցերը ձեւակերպում է այնպես, որպեսզի իրեն ցանկալի պատասխաններ ստանա, մինչդեռ ինքը ցանկանում է իր հարցերի միջոցով իրական պատկերը բացահայտել. «Արդյոք, 250 հոգի, մինչեւ ատամները զինված թուրքի շանորդիների դեմ 32 մեր տղերքը՝ ԱԿՄ-ով զինված, կարո՞ղ էին… հա հասկացանք, պարոն Սիմոնյանին դիմադրություն բառն էր հետաքրքիր, ինքը ստացավ, ինձ այլ բան է հետաքրքիր՝ մի քանի հոգի տարբերությունը կտա՞ր հնարավորություն՝ մարտն այնպես վարել, որ հետեւանքը չառաջանար: Եթե իր կողքը լիներ 5 հոգի, դա ինչ-որ բա՞ն էր փոխելու՝ 250 հոգու առումով»:
Լիպարիտ Սիմոնյանն էլ հակադարձեց. «Պատերազմի ժամանակ մի կողմը կրակում է, մյուս կողմը՝ պաշտպանվում: Պատերազմում չի լինում այնպիսի իրավիճակ, որ սպասեն՝ տեսնեն այս կողմը քիչ է, չհարձակվեն, իսկ այն կողմն էլ մտածի, որ իրենք քիչ են՝ չպաշտպանվեն: Պատերազմը դիմացինին սպանելու նպատակ է հետապնդում եւ եթե ամեն մեկը մտածի, որ իրենից շատ են եւ թողնի ու փախնի՝ այսօր մենք հայրենիք չէին ունենա: Եթե խոսքը գնում է, որ հասարակությանը ցույց տանք՝ շան որդի թուրքերը… շան որդի թուրքերի դեմ պայքարել է պետք, ոչ թե հայկական դիրքը թողնել ու փախնել»:
Կարդացեք նաև
Վկան պնդեց, որ անգամ 5 հագի ավել լինելու դեպքում, դիմադրությունը կարող էր երկարել՝ մինչեւ համապատասխան օգնությունը կհասներ:
Մանրամասները՝ տեսանյութում
Գեւորգ Գեւորգյանի՝ վկային ուղղված հարցերը սահուն վերածվեցին մեկնաբանությունների: Մեղադրող կողմը դատարանին հորդորեց՝ գործընթացը կազմակերպել այնպես, որ հարցերն ըստ էության հնչեն եւ Գեւորգ Գեւորգյանը զսպի էմոցիաները:
«Բայց սա էմոցիաներ է, հերոսի վիճակ է ստացած, չեմ ուզում այս պահին խոսեմ՝ հարցերից կհասկանաք, թե ինչ է կատարվում»,- բորբոքվեց մեղադրյալը:
Գործով այլ վկաներ, իրենց ցուցմունքում հայտարարել են՝ «բարդակ էր»: Գեւորգ Գեւորգյանը վկայից հետաքրքրվեց՝ ի՞նքն ինչ կարծիք ունի այդ մասով: «Տեղում լինեիր՝ բարդակ չլիներ»,- դահլիճից ռեպլիկ արեց ծնողներից մեկը:
Մանրամասները՝ տեսանյութում
Գեւորգ Գեւորգյանին դուր չեկան Արիկ Գոքորյանի ցուցմունքները. «Սաղդ իրար հետ պայմանավորվել եք՝ եկել եք մի բան եք ասում: Ես շատը խոսում եմ Ղազարյան Սամվելի ծնողի համար, ես միայն դրա համար եմ խոսում, ոչ թե պատմվածքներ հորինելու»:
Մանրամասները՝ տեսանյութում
Հիշեցնենք, որ քրեական գործով Գեւորգ Գեւորգյանին մեղադրանք է առաջադրվել՝ ՀՀ քրեական օրենսգրքի 375-րդ հոդվածի 4-րդ մասով. ըստ նախաքննական մարմնի՝ անձնական շահագրգռվածությունից ելնելով` սեփական կյանքը փրկելու նպատակով, ՊԲ N զորամասի հրետանային դիվիզիոնի պատասխանատու սպա, մայորը դրսևորել է իշխանության անգործություն, որն առաջացրել է ծանր հետեւանքներ, մասնավորապես, զոհվել են մարտկոցի քսան պահեստազորայիններ, զինծառայողներ։
Նելլի ԳՐԻԳՈՐՅԱՆ
