Արտաքին գործերի փոխնախարար Վահան Կոստանյանն այսօր խորհրդարանում լրագրողների հետ ճեպազրույցում անդրադարձավ հարցին, թե ո՞վ է վերահսկողություն իրականացնելու ապաշրջափակվող ճանապարհներին՝ հաշվի առնելով այն, որ նոյեմբերի 9-ի հայտարարության մեջ հստակ գրված է, որ վերահսկողությունը պետք է ռուս սահմանապահներն իրականացնեն։ ՌԴ փոխվարչապետ Ալեքսեյ Օվերչուկն ասել է, որ ճանապարհների ապաշրջափակման գլխավոր խնդիրն այն է, թե ով է ապահովելու այդ երթուղիներից օգտվող մարդկանց անվտանգությունը։ Վահան Կոստանյանն ի պատասխան ասաց․ «Նոյեմբերի 9-ի հայտարարության մեջ եւ դրան հաջորդող հրամանագրում, որն ստորագրվել է Ռուսաստանի Դաշնության նախագահի կողմից, խոսվում է ավելի շատ մոնիտորինգի ֆունկցիայի մասին, որը պետք է ռուսական ՖՍԲ-ն իրականացնի, այլ ոչ թե վերահսկողություն։ Բայց ապաշրջափակման դետալները դեռ քննարկման փուլում են»։
Վահան Կոստանյանի լուսանկարը՝ ֆեյսբուքյան էջից
«ՀՀ համար շատ կարեւոր է ֆիքսել սկզբունքները, որ ապաշրջափակումը պիտի տեղի ունենա կողմերի իրավազորության եւ ինքնիշխանության հիման վրա՝ հաշվի առնելով ապաշրջափակման իրականացման փոխադարձությունը։ Եվ այս շրջանակներում Հայաստանի Հանրապետությունը մշտապես կառուցողական է եղել եւ շահագրգռված է եղել իրականացնելու ապաշրջափակման գործընթացը։ Դեռեւս 2021 թվականի հունվարի 11-ին, երբ կնքվեց այս հայտարարությունը, Հայաստանը կառուցողական մոտեցում է դրսեւորել եւ շարունակելու է կառուցողական լինել, որովհետեւ մենք հետաքրքրված ենք տարածաշրջանային ենթակառուցվածքների եւ տրանսպորտային ուղիների ապաշրջափակմամբ եւ կարծում ենք, որ «Հայկական խաչմերուկ» ծրագիրը մեծ պոտենցիալ ունի՝ հաշվի առնելով նաեւ այն աշխարհաքաղաքական զարգացումները եւ լոգիստիկ խնդիրները, որոնց այսօր աշխարհը բախվում է»,- ասաց նա։
Հարցին, որ Ադրբեջանն ավելի շատ հակված է, որ ռուս սահմանապահները հսկեն ապաշրջափակվող ճանապարհները, Վահան Կոստանյանը պատասխանեց․ «Ես ավելի շատ կնախընտրեի ներկայացնել հայկական կողմի դիրքորոշումները։ Հայկական կողմի համար կարեւոր է, որ ապաշրջափակման բոլոր դետալները, այդ թվում՝ անվտանգության հետ կապված, տեղի ունենան ՀՀ ինքնիշխանության եւ իրավազորության սահմաններում։ Եթե մինչ այսօր մեզ չի հաջողվել թղթի վրա ֆիքսել, որ ապաշրջափակումը տեղի է ունենալու ինքնիշխանության եւ իրավազորության շրջանակներում, բնականաբար․․․»։
Անդրադառնալով ՀՀ փոխվարչապետ Մհեր Գրիգորյանի առաջարկին՝ անցկացնել Հայաստանի ու Ադրբեջանի միջև սահմանազատման հարցերով հանձնաժողովների հանդիպում, Կոստանյանն ասաց․ «Թե ապաշրջափակման թեմայով, թե սահմանազատման եւ սահմանային անվտանգության թեմայով, թե խաղաղության պայմանագրի կամ երկու երկրների միջեւ հարաբերությունների հաստատման համաձայնագրի տեքստի վերաբերյալ քննարկումների պարագայում հայկական կողմը մշտապես պատրաստ է հանդիպումների իրականացման հարցով, որովհետեւ մենք շահագրգռված ենք այս բոլոր երեք ուղղություններով արդյունքներ գրանցել»։
Կարդացեք նաև
Ռոզա ՀՈՎՀԱՆՆԻՍՅԱՆ
