Վաղը Եվրո 2024-ի որակավորման փուլի շրջանակներում կայանալիք Հայաստան-Լատվիա ազգային հավաքականների հանդիպումից առաջ հրավիրված նախախաղային մամուլի ասուլիսում Լատվիայի ընտրանու ավագ Ռոբերտ Սավալնիեկսն ասաց, որ Հայաստանն Ուելսի հետ խաղում ցույց տվեց, որ ուժեղ թիմ է եւ կարող է չորս գոլ խփել։ «Հատկապես ուժեղ է Հայաստանի ընտրանու հարձակման գիծը, բայց դա չի նշանակում, որ մենք պետք է փոխենք մեր մոտեցումը խաղին։ Փորձելու ենք վաղը կռվել խաղադաշտում եւ հասնել լավագույն արդյունքի»։
Հավաքականի գլխավոր մարզիչ Դայնիս Կազակեւիչը նշեց, որ օբյեկտիվորեն վաղվա դիմակայությունում ֆավորիտն անկասկած Հայաստանն է, որովհետեւ ՖԻՖԱ-ի դասակարգման աղյուսակում Լատվիայից բարձր տեղ է զբաղեցնում։ «Բայց, ինչպես գիտենք, ամեն ինչ հենց ֆուտբոլի դաշտում է երեւում։ Խաղն սկսվում է 0։0 հաշվից եւ միայն վաղը կիմանանք, թե երկու թիմերից ով է ավելի ուժեղ»։
Aravot.am-ը հարցրեց, թե երկու խաղում կրած երկու անընդմեջ պարտությունից հետո Լատվիայի ֆուտբոլի ֆեդերացիայի ղեկավարությունը գլխավոր մարզչի հետ որեւէ զրույց ունեցե՞լ է։ Եվ եթե վաղը Հայաստանից երրորդ պարտությունը կրի, ի՞նչ է սպասվում գլխավոր մարզչի հետագա կարիերային, Դայնիս Կազակեւիչը պատասխանեց․ «Մենք շատ մեծ սթրեսի մեջ չենք, որովհետեւ այստեղ ենք հայտնվել վիճակահանության արդյունքում 5-րդ զամբյուղից։ Հակառակը, փորձում ենք քայլ առ քայլ առաջ գնալ։ Մենք արտաքինից մեծ ճնշում առանձնապես չենք զգում, բայց ներքնապես մոտիվացված ենք, գիտենք ինչպես պատրաստվել ու վաղվա հանդիպմանը պատրաստ ենք»։
Աշոտ ՀԱԿՈԲՅԱՆ
