Տավուշի մարզի Դիլիջան քաղաքում այսօր առաջին անգամ կայացավ «Միմինո» հայ–վրացական մշակութային–խոհարարական փառատոնը: Փառատոնի մասնակից հայ և վրացի թիմերը տաղավարներում պատրաստեցին և ներկայացրեցին իրենց խոհանոցի բազմազան ուտեստները:
«Հայ խոհարարական ավանդույթների զարգացման և պահպանման ՀԿ» նախագահ և փառատոնի գլխավոր կազմակերպիչ Սեդրակ Մամուլյանն ազդարարեց փառատոնի սկիզբը և ներկայացրեց խոհարարական մրցույթի պայմանները: Փառատոնի մշակութային և երաժշտական գոտիներում ներկայացվեցին ազգային երգ ու պար, արվեստի գործեր, արհեստագործական աշխատանքներ: Դիլիջանի համայնքապետ Դավիթ Սարգսյանն Aravot.am-ի հետ զրույցում հույս հայտնեց, որ «Միմինո»-ն կդառնա ամենամյա փառատոն:
«Ուրախ եմ, որ Միմինոն անցկացվում է Դիլիջանում: Փառատոնի նպատակն է ձևավորել և համաշխարհային շուկայում պատշաճ ներկայացնել ու խթանել հայ-վրացական տարածաշրջանային միասնական զբոսաշրջային արդյունքները, փառատոնն առաջիկա տարիներին դարձնելով միջազգային նշանակության ամենամյա ամենագրավիչ ու հեղինակավոր իրադարձություններից մեկը:
Կարդացեք նաև
Փառատոնը նաև կնպաստի հայկական խոհանոցի զարգացմանն ու հանրահռչակմանը, հայկական մշակութային ժառանգության պահպանությանը, զարգացմանն ու խթանմանը »,-նշեց Սարգսյանը: Հավելենք, որ փառատոնի պաշտոնական աջակիցներն են ՀՀ Էկոնոմիկայի նախարարությունը, ՀՀ Զբոսաշրջության կոմիտեն, համակազմակերպիչը` «Տուրիզմի հայկական ֆեդերացիա ՀԿ-ն:
Լիա ՃԱՂԱՐՅԱՆ
