Տեղեկացրել ենք, որ Ախուրյան համայնքի ավագանու 9 անդամներ նախաձեռնել էին ՀՅԴ-ական համայնքապետ Արծրուն Իգիթյանի անվստահության հարցը։ Նախաձեռնողները նրա թիմակիցներն են։ Նրանք առաջադրել էին Ախուրյանի համայնքապետի տեղակալ, դարձյալ ՀՅԴ-ական Կարեն Արշակյանի թեկնածությունը։
Սա ոմանք որակել էին սեփական իշխանությունը ամրապնդելուն միտված շոու, քանի որ ՏԻՄ օրենքի 68 հոդվածի 8֊րդ կետի համաձայն` այս հարցը քննարկելուց մեկ տարի անց կարող են նորից քննարկել անվստահության հարցը։
Ու քանի օրենքը թույլ է տալիս նախաձեռնող խմբի մեջ չգտնվող անդամներին առաջադրել իրենց թեկնածությունը, ավագանու ՔՊ խմբակցությունը ևս մտադիր էր առաջադրել իր թեկնածուին` Ախուրյանի հիվանդանոցի տնօրեն Զավեն Մանուկյանին։ Ըստ ՏԻՄ օրենքի 68 հոդվածի 3-րդ կետի՝ «Համայնքի ղեկավարին անվստահություն հայտնելու մասին որոշման նախագիծը ներկայացվելուց հետո` 36 ժամվա ընթացքում, նախաձեռնող խմբի մեջ չմտնող ավագանու անդամների ընդհանուր թվի առնվազն մեկ երրորդը կարող է ևս ներկայացնել համայնքի ղեկավարին անվստահություն հայտնելու վերաբերյալ որոշման նախագիծ` առաջադրելով համայնքի ղեկավարի այլ թեկնածու»։
Այսօր ավագանու նիստը չի կայացել. ավագանու անդամներից և ոչ մեկը չի ներկայացել նիստին, անգամ համայնքապետի անվստահությունը նախաձեռնողները։
Կարդացեք նաև
Նունե ԱՐԵՎՇԱՏՅԱՆ
