Կ. Ստանիսլավսկու անվան ռուսական թատրոնը վերադարձել է մոսկովյան հյուրախաղերից, որտեղ «Գարդենիա» ներկայացմամբ մասնակցել է Չեխովյան 16-րդ միջազգային փառատոնին։
«Վերջին 20 օրերին հայ թատրոնի հաղթանակների շրջանն էր արտերկրում: Մայիսի 24-ին Մոսկվայում բացվեց Չեխովյան փառատոնը, որը աշխարհի լավագույն թատերական փառատոների եռյակի մեջ է մտնում: Չնայած ստեղծված քաղաքական իրավիճակին՝ փառատոնը բացվեց ֆանտաստիկ ծրագրով:
Հաջորդ օրը տեղի ունեցավ Նարինե Գրիգորյանի «Մումու» ներկայացման առաջնախաղը: Կոնֆեդերացիայի առաջարկով Նարինե Գրիգորյանը եւ հայկական բեմադրական թիմը հրավիրվել են Մոսկվա, որպեսզի Տագանկա թատրոնի բեմում ներկայացում բեմադրեն: Շատ մեծ հույս ունեմ, որ մեր ԿԳՄՍ նախարարությունը կաջակցի, եւ այդ ներկայացումը կգա նաեւ Երեւան»,-«Արմենպրեսի» մամուլի սրահում կայացած ասուլիսում տեղեկացրեց Հայաստանի թատերական գործիչների միության քարտուղար Սոնա Մելոյանը:
Սոնա Մելոյան
«Հունիսի 2-ին մեկ այլ փառահեղ բեմում՝ Ռուսթավելու անվան Թբիլիսիի ազգային թատրոնում տեղի ունեցավ Հակոբ Ղազանչյանի ներկայացման առաջնախաղը, որը աննախադեպ էր: Ղազանչյանը բեմադրել էր Մարո Մադոյանի «Ապրիր, քանի ապրում ես» պիեսը, որը խաղացին եւ Ռուսթավելու թատրոնը՝ վրացերեն, եւ Պետրոս Ադամյանի անվան թատրոնը՝ հայերեն: Հայ թատրոնի հաղթարշավի վերջնակետը դրեց Ռուսական թատրոնը, որը հունիսի 8-ին ներկայացավ «Գարդենիա» ներկայացմամբ»,-հավելեց Սոնա Մելոյանը:
Կարդացեք նաև
Նրա խոսքով, երրորդ անգամ է Հայաստանը մասնակցում Չեխովյան փառատոնին, եւ սա այն դեպքն է, երբ որակը դառնում է քանակ. «Մոսկվայում Հայաստանն արդեն դարձել է բրենդ: Հայկական ներկայացումներին գալիս են մեծագույն հաճույքով, համոզմամբ, որ դա լինելու է որակ»:
Մարիաննա Մխիթարյան
Կ. Ստանիսլավսկու անվան ռուսական դրամատիկական թատրոնի տնօրեն Մարիաննա Մխիթարյանի խոսքով, իրենց թատրոնի համար մեծ պատիվ է մասնակցել նման բարձրակարգ եւ հետաքրքիր փառատոնի: Մարիաննա Մխիթարյանը հիշեցրեց, որ «Գարդենիան» ստեղծվել էր համավարակի շրջանում եւ մեծ հաջողություն ունեցել. «Սկզբում խաղում էինք բացօթյա, հետո տեղափոխեցինք մեծ բեմ, մասնակցեցինք մի քանի փառատոների՝ Բելառուսում, Տաշքենդում»: Նշեց, որ դերասաններից Ելենա Վարդանյանը «Արտավազդ» է ստացել, ներկայացումը մասնակցել է նաեւ Վորոնեժյան հայտնի փառատոնին ու հաջողություններ գրանցել:
«Մեծ հաջողություն է Հայաստանի համար, որ մեր թատրոնների ներկայացումները մասնակցում են նման փառատոների եւ ֆորումների, եւ մեծ հաջողություն ունեն թե հանդիսատեսի, թե քննադատների եւ թե փառատոների ղեկավարների կողմից: Ապրում ենք այնպիսի դարաշրջանում, որ նման հաջողությունները եւ նման կերպ ներկայանալը մեր երկրի վարկանիշի համար շատ կարեւոր է: Այս դժվար ժամանակներում արվեստում ունեցած հաջողությունները շատ կարեւոր են»,- ասաց Մարիաննա Մխիթարյանը
Գոհար ՀԱԿՈԲՅԱՆ
