ՀՀ կառավարությունն այս տարի հաստատել էր Իջևանի համայնքապետարանի ներկայացրած սուբվենցիոն ծրագրի 5 հայտը: 2023թ-ի ընթացքում կառավարության և համայնքի միջոցներից ընդհանուր մոտ 2.300.000.000 դրամ կծախսվի պլանավորած աշխատանքներն իրականացնելու համար: Իջևանի համայնքապետ Արթուր Ճաղարյանն Aravot.am-ի հետ զրույցում նշեց, որ ծրագրի մեկնարկը տրված է:
«Այս պահին արդեն իսկ մեկնարկել են Իջևան քաղաքի Ղարագյոզյան փողոցի` մինչև Նալբանդյան փողոցի հետ հատվող խաչմերուկ ընկած ճանապարհի ասֆալտապատման աշխատանքները: Այն ընդգրկում է շուրջ 473 գծամետր տարածք: Ծրագրի ընդհանուր արժեքը կազմում է 83 մլն 773 հազար դրամ, որից 37.698.000-ը համայնքի ներդրումն է, 46.075.000-ը` պետության: Մեկնարկել է նաև Սևքարի գյուղամիջյան պուրակի բարեկարգման ծրագիրը, որի ընդհանուր արժեքը 53.969.000 դրամ է, որից 24.289.000-ը համայնքի ներդրումն է, 29.689.000-ը` պետության: Ընդհանուր առմամբ սուբվենցիոն ծրագրում ընդգրկել ենք Իջևան քաղաքում և գյուղական բնակավայրերում առաջնային լուծում պահանջող խնդիրներ: Դրանք ներառում են ներհամայնքային ճանապարհների և բակերի ասֆալտապատման, տուֆ քարով ճանապարհների սալարկման աշխատանքներ: Սահմանամերձ Վազաշեն բնակավայրում կարդիականացվի ոռոգման ջրագիծը, իսկ Խաշթառակում` խմելու ջրագիծը»,-հավելեց Ճաղարյանը:
Լիա ՃԱՂԱՐՅԱՆ
