«Սա քաղաքական հետապնդման գործընթացի մի բաղադրատարր է»,- ՀՀ Քննչական կոմիտեի բակում լրագրողների հետ զրույցում հայտարարեց սահմանադրագետ Վարդան Պողոսյանը՝ անդրադառնալով ՀՀԿ փոխնախագահ Արմեն Աշոտյանի ձերբակալությանը։
Այս ընթացքում Արմեն Աշոտյանին տեղափոխեցին ձերբակալվածների պահման վայր։ Նրան ուղեկցեցին ծափահարություններով։
Վարդան Պողոսյանը նշեց, որ իրավական փաթեթավորումները կարող են տարբեր լինել և ցավով արձանագրեց, որ իրավականը վաղուց մեր երկրում որևէ դեր չի խաղում։
Անդրադառնալով Արմեն Աշոտյանին ձերբակալելու հիմքերին՝ նա ասաց․ «Դեռ հայտնի էլ չէ, թե ինչ պայման է խախտվել։ Քրեական դատավարության օրենսգիրքը նախատեսում է նման հնարավորություն, որ եթե խափանման միջոցի պարագայում տեղի է ունենում որևէ պայմանի խախտում, իրավունք կա անձին ձերբակալել և միաժամանակ դիմել դատարան, որ կալանավորման որոշում կայացնի։ Սակայն մինչև այս պահը հայտնի չէ, թե որն է այդ հիմքը, ի՞նչ պայման է խախտել Արմեն Աշոտյանը, որն առիթ է տվել Քննչական կոմիտեին այս գործողությունները ձեռնարկելու համար»։
Կարդացեք նաև
Ըստ Վարդան Պողոսյանի՝ իշխանությունը ցանկացած առիթ օգտագործում է, որ իրենց անհաճո մարդկանց ձայնը լռեցնի․ «Ենթադրում եմ, համոզված եմ, որ սա քաղաքական հետապնդման հերթական փուլն է՝ լռեցնելու Աշոտյանին»։
Վարդան Պողոսյանն ասաց, որ ոչ այս, ոչ այլ գործերով չի ակնկալում իրավական հանգուցալուծում․ «Ես տեսնում եմ՝ մեր երկրում սահմանադրական կարգը վաղուց քանդված է։ Գործ ունենք իշխանության հետ, որը դավաճանական է, որի նպատակն է հայկական պետական շահերը ոտնահարելու գնով պահպանել սեփական իշխանությունը։ Մեր երկրում սահմանադրական կարգը արդեն վաղուց վերացվել է։ 2020-ի ամռանից սկսած, երբ հակասահմանադրական ճանապարհով Սահմանադրություն փոփոխվեց, ՍԴ-ն կազմաքանդվեց և այն դարձավ գրպանային, այդ բոլոր գործընթացները խորացան։ Պատահական չէ, որ քանդելով ՍԴ-ն, սկսելով դրանից՝ Փաշինյանն իր արտաքին քաղաքական ուղեգիծը տարավ այն գծով, որով տեսնում ենք, քանի որ ՍԴ-ն մեծ անելիք ուներ այս բոլոր գործընթացներում»։
Տաթև ՀԱՐՈՒԹՅՈՒՆՅԱՆ
