ՀՀ փաստաբանների պալատի խորհրդի անդամ Կարեն Մեժլումյանի ֆեյսբուքյան գրառումը
Երևանի քրեական դատարանի դատավոր Դավիթ Հարությունյանն այն դատավորն է, որի մոտ, եթե ընկնում է վստահորդիդ գործը, նախապես վստահորդիդ շնորհավորում ես, քանի որ վստահ ես, որ գործով իրական արդարադատություն է իրականացվելու:
Ասում են` ԲԴԽ-ն ցանկանում է դադարեցնել Դավիթ Հարությունյանի լիազորությունները:
Այժմ մի զուգադիպության մասին:
Կարդացեք նաև
13.06.2023թ.-ին ԲԴԽ կայքում տեղադրվեց հաղորդագրություն այն մասին, որ 19.06.2023թ-ին քննվելու է Երևան քաղաքի քրեական դատարանի դատավոր Դավիթ Հարությունյանին կարգապահական պատասխանատվության ենթարկելու հարցը:
13.06.2023թ.-ին դատախազության կայքում տեղադրվեց հաղորդագրություն այն մասին, որ Աննա Վարդապետյանը հունիսի 13-ին Կոտայքի մարզի դատախազությունում ներկայացրել է մարզի նորանշանակ դատախազ Սևակ Պողոսյանին:
Դավիթ Հարությունյանն այն դատավորն է, որը հանցակազմի բացակայության հիմքով արդարացրեց ծանր հանցագործության մեջ շինծու մեղադրանքով մեղադրվող (մեղադրվում էին խմբի կազմով Նարեկ Մալյանին առևանգելու փորձի մեջ, որը նախատեսում էր 4-8 տարի ազատազրկում) «Ռեստարտ» նախաձեռնության 6 անդամներին` Դավիթ Պետրոսյանին, Դավիթ Սիմոնյանին, Արամայիս Պետրոսյանին, Գարիկ Միսկարյանին, Հրաչյա Խլղաթյանին ու Յուրի Ավագյանին:
Սևակ Պողոսյանն այն դատախազն է, որը դատարանում պաշտպանում էր «Ռեստարտի» տղաների դեմ շինծու մեղադրանքը, իսկ հետո վերաքննիչ բողոք բերեց դատավոր Դավիթ Հարությունյանի կայացրած արդարացման դատավճռի դեմ:
Վերաքննիչ դատարանը (դատավորներ` Արշակ Վարդանյան, Վազգեն Ռշտունի և Արսեն Նիկողոսյան) դատախազ Սևակ Պողոսյանի և տուժողի ներկայացուցչի բողոքները մերժեց` արդարացման դատավճիռը թողնելով անփոփոխ:
Հ.Գ. 1. Երբ տեղեկացանք, որ գործը վարույթ է ընդունել դատավոր Դավիթ Հարությունյանը, ես ու Ինեսսա Պետրոսյանը աչքալուսանք արեցինք «Ռեստարտի» տղաներին, պարզաբանելով, որ դատավոր Հարությունյանը արդարադատություն է իրականացնելու և չի կաշկանդվի դատախազության շինծու մեղադրանքով:
Հ.Գ. 2. Համաձայնեք, որ և՛ առաջին ատյանի և՛ վերաքննիչ դատարանի նշված կազմերն իդեալական են արդարադատություն ակնկալողների համար և այդ առումով «Ռեստարտ» տղաների բախտը բերել էր:
