«Արդեն մի քանի տարի է՝ քաղաքական ենթատեքստ ունեցող ձերբակալություններ, դատավարություններ, տարբեր սենսացիոն գործողություններ իրավական համակարգի կողմից իրականացվում են քաղաքական ենթատեքստերով։ Արմեն Աշոտյանի հետ կապված չակերտավոր գործի էությունը և այսօրվա՝ նրան ձերբակալելու որոշումն էլ այդ քաղաքական ենթատեքստի շարունակությունն են»,- ՀՀ քննչական կոմիտեի բակում լրագրողների հետ զրույցում հայտարարեց ՀՀԿ խորհրդի անդամ Արտակ Զաքարյանը։
Ըստ նրա՝ ակնհայտ է, որ այսօր ընդդիմությունը կոշտ կերպով խանգարում է իշխանությանը իրենց հակապետական գործողությունների իրականացման հարցում։ Նա ահազանգեց՝ մեր երկրի և Արցախի շուրջ տեղի ունեցող զարգացումները գնալով ավելի խնդրահարույց ու անկառավարելի են դառնում․ «Այս իշխանությունները նույնիսկ անվտանգային իրավիճակին չեն տիրապետում։ Ադրբեջանն իրեն պահում է լկտիաբար, Թուրքիայի կողմից ստանում է բավարար աջակցություն, և Էրդողանի հայտարարություններն էլ՝ Ադրբեջանում արված գալիս են լրացնելու, որ նրանք միջանցք գաղափարից չեն հրաժարվել, իսկ դրա պատճառը ՀՀ իշխանությունների թուլությունն է»։
Իսկ թե ինչպիսի հակազդեցություն կարող է լինել ստեղծված իրավիճակին, Արտակ Զաքարյանն ասաց․ «Ցավոք, շատ չեն հնարավորությունները։ ՌԴ-ի և Իրանի հետ լիարժեք քաղաքական պայմանավորվածություններն են առաջին հերթին հայ ժողովրդի և Արցախի անվտանգային միջավայրն ապահովելու։ Կյանքը ցույց տվեց, որ Արևմուտքը ոչ մի կերպ ի զորու չէ։ Արևմուտքը, քանի որ օգտագործում է այս իշխանությանը, ցանկանում է ստանալ այս իշխանություններից իր համար շահավետ վերջին լուծումները, դրանից հետո նրանց ևս շպրտելու են դուրս»։
Արտակ Զաքարյանն ասաց՝ երբ Արմեն Աշոտյանն անվտանգության մասին է խոսում, հաստատ իր անվտանգության մասին չի խոսում միայն, այլ մեր պետության, հետևաբար յուրաքանչյուր քաղաքացու։ Ուստի սա ոչ թե իշխանության պայքար է, այլ մեր բոլորի պայքարը։
Կարդացեք նաև
Տաթև ՀԱՐՈՒԹՅՈՒՆՅԱՆ
