Ադրբեջանի ԱԳՆ-ն այսօր Լաչինի միջանցքի սկզբնամասում տեղի ունեցած միջադեպի համար Հայաստանին մեղադրել է «ռազմական սադրանքի» մեջ:
«Բացի այն, որ այդ ռազմական սադրանքը ագրեսիա է Ադրբեջանի ինքնիշխանության և տարածքային ամբողջականության դեմ, դա միտված է նրան, որպեսզի խոչընդոտվի ադրբեջանական կողմում սահմանային անցակետի բարեհաջող աշխատանքը, հայ բնակիչների անվտանգ, ազատ և անխոչընդոտ տեղաշարժը, ինչպես նաև տեղաշարժը Լաչինի ճանապարհով»,- ասվում է հաղորդագրության մեջ:
Ադրբեջանի ԱԳՆ-ն նշել է, որ այդ «ռազմական սադրանքը» Հայաստանի կողմից, որը «չի կարողանում հաշտվել անցակետով հայ բնակիչների անխոչընդոտ տեղաշարժի հետ», վառ օրինակ է այն բանի, որ «Հայաստանը շահագրգռված չէ Ադրբեջանի հետ հարաբերություններ ձևավորելու հարցում և խաղաղության գործընթացում»:
«Հայաստանի կողմից նման ռազմական սադրանքները վճռականորեն կկանխվեն, իսկ Հայաստանի փորձերը՝ խոչընդոտելու Ադրբեջանում ապրող հայերի՝ մեր հանրության մեջ վերաինտեգրմանը, անհաջողություն կկրեն»,- ասվում է հայտարարության մեջ:
Կարդացեք նաև
Ադրբեջանի ԱԳՆ-ն նաև կոչով դիմել է միջազգային հանրությանը՝ «վճռականորեն դատապարտելու հայկական կողմի այդ սադրանքը և հետ պահելու Հայաստանին այնպիսի թշնամական գործողություններից, որոնք սպառնում են տարածաշրջանում խաղաղությանն ու կայունությանը»:
Պատրաստեց Վիկտորյա ԱՆԴՐԵԱՍՅԱՆԸ
