ԱԺ նիստում բյուջեի կատարողականի քննարկման ժամանակ բանավեճ տեղի ունեցավ ՔՊ խմբակցության պատգամավորների եւ «Հայաստան» խմբակցության ղեկավար Սեյրան Օհանյանի միջեւ։
«Պարոն Օհանյան, մինչեւ ապրիլյան պատերազմը Հայաստանի զինված ուժերում 1920-30-ականների արտադրության հրանոթներ էին, 1960-1980-ականների «Զիլ»-երով էին տեղափոխում մեր տղերքին»,- իր ելույթում ասաց Վահագն Ալեքսանյանը։
Սեյրան Օհանյանը տեղից արձագանքեց. «Դու էլ՝ առանց մայկա–տռուսիկ»։
Նրան պատասխանեց ԱԺ նախագահ Ալեն Սիմոնյանը։ «Ջղայնացեք, դուրս եկեք, պարոն Օհանյան, մի բան արեք, բայց մի շարունակեք։ Դուք նոր վիրավորական արտահայտություն արեցիք, հիշեք, ո՞վ է ձերոնցից առանց մայկա-տռուսիկ եկել իշխանություն դարձել ու ինչի տեր է դարձել։ Կարող եմ ցուցակը ներկայացնել՝ ծակ կոշիկներով։ Իսկ հիմա լքեք դահլիճը։ Ինձ թվում է՝ դուք չեք գիտակցում որտեղ եք գտնվում եւ ով եք դուք»,- ասաց Ալեն Սիմոնյանը։
Կարդացեք նաև
«Բանակում ոչ մի բան չի եղել, ոչ մեքենա է եղել, ոչ հրետանի է եղել, ոչ ինքնաձիգ է եղել, ոչ մի բան չի եղել։ Եվ երբ իրենք 1960-70-ական թվականների «Զիլ»-երով էին, դուք ու ձեր մերձավոր շրջապատը 2016 կամ 2017 թվականի մեքենաներով էիք շրջում, որովհետեւ ձեր կաշին միշտ շատ ավելի թանկ է եղել, քան զինվորինը»,- շարունակեց Վահագն Ալեքսանյանը։
Սեյրան Օհանյանը Վահագն Ալեքսանյանին «սուտասան» անվանեց։
Պատգամավորներ Սեյրան Օհանյանին ու Վիգեն Խաչատրյանին Ալեն Սիմոնյանը նախազգուշացում հայտարարեց։
Ռոզա ՀՈՎՀԱՆՆԻՍՅԱՆ
