Վերջին շրջանում Հայաստանում աղիքային վարակների եւ այլ վիրուսային հիվանդությունների կտրուկ աճ է նկատվում:
Հիվանդությունների վերահսկման եւ կանխարգելման կենտրոնի համաճարակաբանության վարչության պետ Ռոմելա Աբովյանը «Հրապարակի» հետ զրույցում ասում է, որ Հայաստանում աղիքային վարակների ակտիվացումը սեզոնային գործոնով է պայմանավորված։ Դիզենտերիան, ինչպես բոլոր աղիքային հիվանդությունները, տարվա տաք սեզոնին ակտիվանում է։ Ներկայում Հայաստանում, սեզոնին համապատասխան, աղիքային վարակներն ունեն աճի միտում, սակայն եթե համեմատենք նախորդ տարվա այս շրջանի հետ, կարող ենք փաստել, որ աղիքային վարակով հոսպիտալացված քաղաքացիների թիվը նվազել է: Բայց աղիքային վարակների սեզոնային ակտիվության հետ կապված՝ բնակիչները մտահոգություն են հայտնում, թե վարակը հնարավոր է պայմանավորված լինի ոչ որակյալ ջրի օգտագործմամբ, իսկ մասնագետները կասկածներ ունեն, որ ստորգետնյա կոմունիկացիաներն այնքան վատ վիճակում են, որ խմելու ջրի եւ կոյուղաջրերի խառնվելու հավանականությունը մեծ է:
Մեր զրուցակիցը պնդում է, որ այս մտահոգություններն անհիմն են, այդ են փաստում նաեւ լաբորատոր հետազոտությունների արդյունքները:
«Տարիների փորձը ցույց է տվել, որ աղիքային վարակների սեզոնն ամռանն է: Մայիս ամսվա ընթացքում արձանագրվել է 795 դեպք, ինչը նախորդ տարվա այդ ժամանակահատվածի համեմատ քիչ է 1,3 անգամ»,- նշում է Ռոմելա Աբովյանը:
Հայկ ԳԵՎՈՐԳՅԱՆ
Հոդվածն ամբողջությամբ՝ «Հրապարակ» օրաթերթի այսօրվա համարում:
