ԿԳՄՍ նախարար Ժաննա Անդրեասյանը Ազգային ժողով-կառավարություն հարցուպատասխանի ժամանակ անդրադարձավ միասնական քննությունների ժամանակ կիրառվող կեղծիքների հարցին։ Ըստ նրա՝ 9-րդ դասարանն ավարտում են 35 հազար սովորողներ, միասնական քննություններ են հանձնում ավելի քան 13 հազար սովորողներ, ավարտական քննություններ հանձնողները շուրջ 21 հազար են կազմում։ Այսինքն՝ սա զանգվածային գործընթաց է, եւ վերահսկողության մասով կարող են լինել խնդիրներ։
«Այս պահին դեռեւս խոշոր միասնական քննություններն առջեւում են, միասնական քննությունները կավարտվեն հունիսի 27-ին։ Այս պահի դրությամբ ինձ հասանելի տեղեկատվությամբ՝ 6 դեպքում քննություն հանձնողները քննությունից հեռացվել են, նրանց մոտ հայտնաբերվել են տեխնիկական միջոցներ։ Եվ ունենք դիմորդներ՝ 8 հոգի, որոնք նախնական որոշակի փորձեր են արել՝ քննություն չհանձնելու, բժշկական տեղեկանք ներկայացնելու փորձեր են արել։ Սրանք բոլորը շատ մանրակրկիտ ստուգվում են։ Մեր երեխաները շատ հնարամիտ են, ես չեմ բացառում, որ տեխնիկական միջոցներից օգտվելու այնպիսի հնարավորություններ են գտնում, որ դեռ բացահայտելու եւ այդ ձեւերը հասկանալու կարիք կունենանք»,- ասաց Ժաննա Անդրեասյանը՝ նշելով, որ հավելյալ վերահսկողության կարիք կա։
Նախարարը նշեց, որ երբեմն այդ կեղծիքին ներգրավված են կրթական հաստատությունների աշխատակիցները, մասնավորապես, 9-րդ դասարանի ավարտական քննությունների դեպքում խոսքն ուսուցիչների մասին է։ «Մենք ուսուցիչների էթիկայի վարքականոն ենք սահմանել, որտեղ նման դեպքերով առաջիկայում նախատեսում ենք շատ լուրջ գործընթացներ իրականացնել, որպեսզի բացառենք պրոցեսը, երբ ուսուցիչը մասնակցում է կեղծիքին»,- նշեց նախարարը։
Անդրեասյանն անդրադարձավ նաեւ թեստերի փոփոխության մասին հարցին՝ նշելով, չափորոշիչների փոփոխությամբ ամբողջությամբ փոխում են քննությունների համակարգն ու բովանդակությունը։ «Հաջորդ տարի դա կփորձարկվի Տավուշի մարզում, այնուհետեւ կկարողանանք ամբողջ հանրապետությունում ունենալ նոր մոտեցում»,- ասաց նա։
Կարդացեք նաև
Ռոզա ՀՈՎՀԱՆՆԻՍՅԱՆ
