Հունիսի 13-16-ը Մարաքեշում ընթացող Միջխորհրդարանական միության` միջդավանանքային երկխոսությանը նվիրված համաժողովին ելույթ է ունեցել կառույցում ՀՀ ԱԺ պատվիրակության անդամ, ԱԺ «Քաղաքացիական պայմանագիր» խմբակցության անդամ Հերիքնազ Տիգրանյանը:
«Հարգելի գործընկերներ,
Նախեւառաջ թույլ տվեք շնորհակալություն հայտնել մեր մարոկկացի տանտերերին այս կարեւոր համաժողովի հրաշալի կազմակերպման համար:
Ես ներկայացնում եմ Հայաստանի Հանրապետությունը, մի երկիր, որն առաջինն է ընդունել քրիստոնեությունը` որպես պետական կրոն: Սա ընդգծում եմ մեր Համաժողովի խորագրի համատեքստում` հատկանշելու համար, որ մարդու իրավունքների հարգումը եւ պաշտպանությունը վերպետական եւ վերկրոնական է: Այն համընդհանուր արժեք է:
Կարդացեք նաև
Օրենքի գերակայությունն օրենքի առաջ բոլորի հավասարությունն իրավական պետության հիմնասյունն ու հիմնական սկզբունքներից է:
Ցավոք, մենք տեսնում ենք, որ որոշ պետություններ չեն հարգում օրենքի գերակայությունը, չեն կատարում անգամ միջազգային ատյանների որոշումները, եւ այդ ամենը մնում է անհետեւանք եւ առանց պատասխանատվության: Իմ կարծիքով սա անթույլատրելի երկակի ստանդարտ է եւ ժողովրդավարությունից հետքայլ:
Մասնավորապես, Արդարադատության միջազգային դատարանն Ադրբեջանի նկատմամբ հրատապ միջոց է կիրառել` պարտադրելով ապաշրջափակել Լաչինի ճանապարհը: Սակայն անցել է ավելի քան չորս ամիս, եւ այս որոշումը չի կատարվել: Ավելին` Ադրբեջանն անցակետ է տեղադրել Լաչինի ճանապարհի վրա` այն ամբողջությամբ իր վերահսկողության տակ առնելով եւ փակելով Լեռնային Ղարաբաղի` 120.000 մարդու կյանքի ճանապարհը` դրանով իսկ ստեղծելով հումանիտար աղետ:
Ադրբեջանն իրեն վեր է դասում միջազգային իրավունքից եւ արդարադատությունից` անտեսելով նաեւ միջազգային հանրության հստակ կոչերը միջանցքը բացելու պահանջով:
Այսօր աշխարհը, այդ թվում` մեր տարածաշրջանը, կանգնած է նոր մարտահրավերների առաջ: Եվ քանի դեռ աշխարհի ուշադրությունն արդարացիորեն բեւեռված է Ուկրաինայում պատերազմի վրա, Ադրբեջանն օգտվում է առիթից եւ շարունակում իր ագրեսիվ քաղաքականությունը` տարածքային նկրտումներ ունենալով Հայաստանի սուվերեն տարածքի նկատմամբ: Պարբերաբար ռազմական սադրանքների դիմելով վերջին երկու տարվա ընթացքում օկուպացրել է մեր պետության 150 քկմ տարածք:
Սա միջազգային իրավունքի կոպիտ խախտում է:
Գործընկերնե’ր, ավտորիտար համակարգը մարտահրավեր է նետում ժողովրդավարությանը, սա չի կարելի հանդուրժել, հարգելի’ գործընկերներ, պետք է զսպել ագրեսորին:
Շնորհակալություն ուշադրության համար»,- նշել է Հերիքնազ Տիգրանյանը:
ԱԺ
