ԱԺ հայտարարությունների ժամին «Քաղաքացիական պայմանագիր» խմբակցության քարտուղար Արթուր Հովհաննիսյանն անդրադարձավ ընդդիմադիր պատգամավորների ելույթներին։ «Դարձյալ անվանարկում են, «սրանք»-ով են խոսում։ Մեր ժողովուրդը զզվել է այս ամեն ինչից, որովհետեւ մեր երկիրը կանգնած է շատ ճակատագրական դժվարին իրողության առաջ, Արցախի մեր հայրենակիցները գտնվում են շրջափակման մեջ, Լաչինի միջանցքն արգելափակված է, հումանիտար խնդիրները խորանում են։ Հիմա այս ամեն ինչի ֆոնին՝ գալիս են, էլի շարադրությունների տրամաբանության մեջ, չգիտեմ, ինչ պատվերներ են կատարում, հետո օրագրերը երեւի երեկոյան տանում են, որ իրենց 5 նշանակեն»,- ասաց նա։
Ըստ Արթուր Հովհաննիսյանի՝ պրոֆեսիոնալ բանակով պետք է ամուր պահենք մեր սահմանները։ «Սա մեր պետության թիվ մեկ անելիքն է։ Եվ այս ուղղությամբ շատ կոնկրետ աշխատանքներ են տարվում, որի մասին գիտի նաեւ ընդդիմությունը։ Ճանապարհների ապաշրջափակում եւ ենթակառուցվածքների ապաշրջափակում, որոնք պետք է գործեն յուրաքանչյուր պետության սուվերենության ներքո, որի միջոցով մենք պետք է ապահովենք տնտեսական զարգացում, հետեւաբար՝ նաեւ բանակի ամրություն։ Ստեփանակերտ-Բաքու խոսակցությունն անհրաժեշտություն է, որովհետեւ կիրացվեն Արցախի մեր հայրենակիցների իրավունքները միջազգային հովանու ներքո։ Սա եւս տեսնում է ընդդիմությունը։
Զուգահեռ այս ամենին ի՞նչ է առաջարկում ընդդիմությունը՝ ըստ էության ոչինչ չի առաջարկում, որովհետեւ ոչինչ չի կարող առաջակել, որովհետեւ առնվազն տեղյակ չէ, թե ինչ է քննարկվում։ Մարդիկ հրաժարվում են տեղյակ լինել բանակցային գործընթացում քննարկվող նրբություններից, վախենում են պատասխանատվությունից։ Եվ հետո գալիս, մերկապարանոց ու չհիմնավորված հայտարարություններ անում՝ ողողված ստերով։
Իսկ կարո՞ղ է ես ինձ թույլ տամ մտածել, որ ընդդիմության մեր գործընկերները պարզապես պատերազմի հրձիգներ են, որոնք փորձում են կատարել 5-րդ շարասյան իրենց դերը, կատարելով միգուցե երրորդ երկրների պատվերները, որպեսզի պատերազմի ֆոնին նոյեմբերի 9-2 անեն եւ գան իշխանության՝ թքած ունենալով, թե արանքում ինչ կտան ՀՀ սուվերեն տարածքից ու ինչ կլինի Արցախի հետ»,- հայտարարեց Արթուր Հովհաննիսյանը։
Կարդացեք նաև
Ռոզա ՀՈՎՀԱՆՆԻՍՅԱՆ
