2023 թվականի համար կենտրոնական բանկը կանխատեսում է 6.9% տնտեսական աճ, ինչը մեկ տոկոսով բարձր է նախկին կանխատեսումից։ Այս մասին այսօր հրավիրված ասուլիսում ասաց ԿԲ նախագահ Մարտին Գալստյանը։
Նրա խոսքով՝ 6.9% տնտեսական աճը պայմանավորված է հիմնականում շինարարության եւ ծառայությունների ոլորտի առաջանցիկ զարգացումներով։
Եվրասիական զարգացման բանկի գնահատմամբ՝ Հայաստանի տնտեսության ռիսկերից է համարվում, որ միջազգային այցելուների արտահոսք կարող է լինել, ինչը կհանգեցնի ՀՀ ՀՆԱ-ի 5-10% նվազման։ Լրագրողի այս դիտարկմանն ի պատասխան՝ ԿԲ նախագահն ասաց․ «Այն վերջին նյութերը, որոնցով մենք ենք աշխատում, հարցումներ են, ոչ հավաստի տեղեկություններ, որովհետեւ չափազանց դժվար է կանխատեսել մարդկանց վարքագիծը՝ պայմանավորված աշխարհաքաղաքական զարգացումներով եւ այլ տիպի որոշումներով։ Իմ տեսած վերջին կանխատեսումներով, միջազգային այցելուների՝ Հայաստանում անցկացնելու ժամանակային հորիզոնը որոշակիորեն երկարել էր։ Իրենք չեն ակնկալում, որ ռուս-ուկրաինական հակամարտությունը կունենա արագ հանգուցալուծում, կկարողանան վերադառնալ իրենց բնականոն կյանքին։ Ուստի Հայաստանում ավելի երկար ժամանակ անցկացնելու ցանկություն հայտնած մարդկանց թիվը որոշակիորեն աճել էր»։
Ինչ վերաբերում է գնաճային կանխատեսումներին, ապա Գալստյանն ասաց՝ ԿԲ կանխատեսումներով գնաճն այս տարվա ընթացքում կլինի թիրախից՝ 4%-ից որոշակի ցածր։
Կարդացեք նաև
«Վերջին զարգացումների ընթացքում տեղի է ունեցել մի ֆենոմեն՝ տեսնում ենք, որ ներմուծվող պարենային ապրանքների գները շատ ավելի կտրուկ են նվազում, քան նախկինում կանխատեսում էինք։ Բայց կա նաեւ չկարգավորվող ծառայությունների էական մաս, որը շարունակում է մնալ ավելի բարձր մակարդակում, քան գնաճի մեր թիրախն է»,-ասաց ԿԲ նախագահը։
Մանրամասն՝ տեսանյութում
Նելլի ԲԱԲԱՅԱՆ
Լուսանկարը՝ ԿԲ ֆեյսբուքյան էջից
