Փոխվարչապետ Մհեր Գրիգորյանը մասնակցել է Ռուսաստանի օրվա կապակցությամբ ՌԴ դեսպանության կողմից կազմակերպված միջոցառմանը, հայտնում է ՀՀ կառավարությունը: Փոխվարչապետը Կառավարության անունից շնորհավորական ուղերձ է հղել և մաղթել եղբայրական Ռուսաստանին խաղաղություն, բարօրություն և բարգավաճում:
«Sputnik Արմենիան» մեջբերում է, ՀՀ փոխվարչապետի ելույթից հատվածներ:
Անհրաժեշտ է այսուհետ ևս ապահովել Հայաստանի ու Ռուսաստանի ռազմավարական փոխգործակցության պատշաճ մակարդակը, հայտարարել է ՀՀ փոխվարչապետ Մհեր Գրիգորյանը Ռուսաստանի օրվա կապակցությամբ Հայաստանում ՌԴ դեսպանատանը տեղի ունեցած ընդունելության ժամանակ։
Երկու երկրների հարաբերությունները դինամիկ զարգանում են տնտեսական, հումանիտար, առևտրային, մշակութային և այլ ոլորտներում: Երկու պետությունների միջև կառուցողական փոխգործակցություն է հաստատվել միջազգային կազմակերպությունների շրջանակներում։ Սակայն նա նշել է, որ այդուհանդերձ, համագործակցության հետագա խորացման մեծ ներուժ կա։ «Հայաստանի և Ռուսաստանի ժողովուրդների՝ հարուստ պատմություն ունեցող դաշնակցային հարաբերությունները հուսալի հիմք են հանդիսանում մեր պետությունների միջև բազմակողմ համագործակցության հետագա զարգացման համար», – ասել է Գրիգորյանը:
Կարդացեք նաև
Նա նշել է, որ ժամանակակից Ռուսաստանի համար այս օրը խորհրդանշում է ազգային պետականությունն իր բազմադարյա պատմությամբ, մշակույթով և ավանդույթներով: Գրիգորյանը ավելացրել է, որ այդ երկրի ուժը միասնության և համերաշխության արժեքների մեջ է, որոնց նա հավատարիմ է։
