«Եթե այսօր տեսնեմ Ալեն Սիմոնյանին, կասեմ նույն բանը՝ առանց հայհոյելու, առանց անկիրթ լինելու ես իրեն կդիմեմ ու բոլոր կառավարության անդամներին ու կասեմ, որ իրենք դավաճան են։ Իրենք մաս են կազմում դավաճանական գործարքի եւ իրականացնում են օտարների ծրագիրը։ Սա հայ ազգի ծրագիրը չէ, Արցախը որպես Ադրբեջանի մաս ընդունելը հայ ազգի շահերից չի բխում, դա մեր ուզածը չէ»,- այսօր լրագրողների հետ զրույցում ասաց հայրենադարձ Կարեն Մկրտչյանը, որն ԱԺ նախագահ Ալեն Սիմոնյանի հետ վեճ էր ունեցել։
Հիշեցնենք, որ այս տարվա ապրիլի 2-ին Ալեն Սիմոնյանի և ՀՅԴ անդամ Կարեն Մկրտչյանի միջև հանրային վայրում տեղի էր ունեցել միջադեպ, որի ժամանակ Մկրտչյանը Ալեն Սիմոնյանին անվանել էր «դավաճան»։ Ի պատասխան՝ Ալեն Սիմոնյանը թքել էր նրա դեմքին։
Նա նշեց, որ Ալեն Սիմոնյանի արարքից հետո հաղորդում էր ներկայացվել Գլխավոր դատախազություն։ «Բայց ինչպես ես էի սպասում եւ շատերն էին սպասում, դատախազությունը ոչ մի քայլ չձեռնարկեց, ընդհակառակը, լղոզված մի ձեւակերպում տվեցին, որպեսզի փակեն գործը։ Իրական ժողովրդավարության մեջ մենք չենք ապրում, սա ցուցիչ է այն մեծ ստի, որի մեջ մեր հայրենակիցներից շատերն ապրում են։ Սա իմիտացիա է, ժողովրդավարությունն իրական չէ, դատական համակարգն անկախ չէ, եւ ես ուրիշ արդյունք չէի սպասում։ Բայց ես սպասում եմ, որ մեր հայրենակիցներն իրենց ասելիքը կասեն, կհամախմբվեն, որպեսզի մենք կերտենք այն արդար ու իրական ժողովրդավար Հայաստանը, որի մասին երազել ենք»,- նշեց Կարեն Մկրտչյանը։
Կարեն Մկրտչյանն ասաց՝ բոլոր հայերը, ովքեր մտահոգ են հայրենիքի ապագայով, պետք է միավորվեն, մի կողմ դնեն իրենց թերահավատությունն ու տարաձայնությունները։ «Պետք է մեր հավաքական կամքը մեջտեղ բերենք, որը, ես կարծում եմ, հնարավոր է։ Չեմ էլ կասկածում, որ հայության մեծամասնությունը Արցախի կողքին է այս օրերին»,- հավելեց նա։
Կարդացեք նաև
Ռոզա ՀՈՎՀԱՆՆԻՍՅԱՆ
