2022 թվականի պետական բյուջեի կատարողականով արձանագրվել է աճ բոլոր ոլորտներում, գործազրկությունը նվազել է, ստեղծվել են նոր աշխատատեղեր. նշել է ՀՀ ֆինանսների նախարար Վահե Հովհաննիսյանն ԱԺ ֆինանսավարկային եւ բյուջետային հարցերի մշտական հանձնաժողովի՝ հունիսի 12-ի արտահերթ նիստում, որի օրակարգում «ՀՀ 2022 թվականի պետական բյուջեի կատարման տարեկան հաշվետվությունը հաստատելու մասին» հարցն էր: Նախարարը հանգամանալի ներկայացրել է բոլոր ոլորտների կատարողականի թվային տվյալները, կատարված աշխատանքներն ու բյուջետային ծրագրերը:
Ըստ այդմ՝ 2022 թվականին գրանցվել է ՀՆԱ-ի 12.6 տոկոս իրական աճ, որը պայմանավորված է եղել հիմնականում ծառայությունների աճով՝ շուրջ 28 տոկոս: Արդյունաբերությունն աճել է 7.9 տոկոսով, շինարարության նպաստումը տնտեսական աճին՝ 1.2 տոկոսային կետ է կազմել:
Հաշվետու տարում ապրանքների եւ ծառայությունների արտահանման իրական ծավալներն աճել են 54.4 տոկոսով՝ պայմանավորված արտաքին պահանջարկի աճով՝ ՏՏ ոլորտ, զբոսաշրջիկներին մատուցված ծառայություններ:
2022 թվականին 12-ամսյա գնաճը զգալիորեն արագացել է հունիսին՝ հասնելով մինչեւ 10.3 տոկոսի: Սակայն, ըստ Ֆինանսների նախարարի, Կենտրոնական բանկի վարած նպատակային դրամավարկային քաղաքականության արդյունքում դեկտեմբերին նվազել է՝ կազմելով 8.3 տոկոս:
Կարդացեք նաև
2022 թվականին պետական բյուջեի փաստացի եկամուտները կազմել են 2.063.1մլրդ դրամ՝ ապահովելով ճշտված ծրագրի 100.2 կատարողական:
Պետական բյուջեի հարկային եկամուտները եւ պետական տուրքերը կազմել են շուրջ 1.926.0 մլրդ դրամ, որը 104.4 տոկոսով ապահովել է ճշտված ծրագրով սահմանված ցուցանիշը: 2021 թվականի համեմատ հարկային եկամուտների պետական տուրքերն աճել են 21.4 տոկոսով կամ 339.1 դրամով, ինչը հիմնականում պայմանավորված ԱԱՀ-ի, շահութահարկի եւ եկամտային հարկի գծով մուտքերի աճով:
2022 թվականի պետական բյուջեի ծախսերը կազմել են 2.242.6 մլրդ դրամ, իսկ տարեկան ճշտված ծրագիրը կատարվել է 98 տոկոսով: Ծրագրից շեղման ընդհանուր գումարի 56.8 տոկոսը բաժին է ընկել ընթացիկ ծախսերին, 43.2 տոկոսը՝ ոչ ֆինանսական ակտիվների հետ գործառնություններին:
Նշվել է, որ աննախադեպ է կապիտալ ծախսերի կատարողականը՝ 95 տոկոս:
Պակասուրդ/ՀՆԱ ցուցանիշը 2022 թվականին կազմել է 2.1 տոկոս՝ կանխատեսված 3 տոկոսի եւ 2021 թվականի 4.6 տոկոսի դիմաց: Հաշվետու տարում փոխվել է պակասուրդի ֆինանսավորման աղբյուրների կառուցվածքը: Եթե նախորդ տարի զգալի չափով՝ 68.4 տոկոս, ֆինանսավորվել էր արտաքին աղբյուրներից՝ պայմանավորված արտարժութային պետական պարտատոմսերի թողարկմամբ, ապա 2022 թվականին պակասուրդն ամբողջությամբ ֆինանսավորվել է ներքին աղբյուրների հաշվին:
Արտաքին վարկերի մարմանը հաշվետու տարում ուղղվել է շուրջ 99.6 մլրդ դրամ՝ կազմելով ծրագրի 98.2 տոկոսը: Հաշվետու ժամանակահատվածում դեկտեմբերի 31-ի դրությամբ ՀՀ արտաքին պետական պարտքը կազմել է 44.186.7 մլրդ դրամ կամ 10.637.7 մլրդ դոլար: ՀՀ պետական պարտքը կազմել է ՀՆԱ-ի 49.3 տոկոսը՝ նախորդ տարվա համեմատ նվազելով 14.2 տոկոսային կետով: Իսկ Կառավարության պարտքը կազմել է ՀՆԱ-ի 46.7 տոկոսը՝ 2021 թվականի համեմատ նվազելով 13.6 տոկոսով:
Վահե Հովհաննիսյանի հավաստմամբ 2022 թվականին գրեթե բոլոր ոլորտներում աճ է արձանագրվել, գործազրկությունը նվազել է, ստեղծվել են նոր աշխատատեղեր:
Ըստ նախարարի՝ 2022 թվականին մեծ պահանջարկ է գրանցվել պետական արժեթղթերի նկատմամբ: Արտաքին ներդրողներն իրենց նպաստն են բերել Պետական պարտատոմսերի շուկայի զարգացմանը:
ՀՀ ֆինանսների նախարարը պատասխանել է պատգամավորների հարցերին, որոնք առնչվել են գիտության եւ կրթության ֆինանսավորմանը, այլ ոլորտների արդյունքային ցուցանիշներին:
ԱԺ ֆինանսավարկային եւ բյուջետային հարցերի մշտական հանձնաժողովի նախագահ Գեւորգ Պապոյանը նախ շնորհակալություն է հայտնել ընդդիմադիր գործընկերներին բյուջետային քննարկումներին նպատակային մասնակցության համար եւ ընդգծել բովանդակային քննարկման կարեւորությունը: Անդրադառնալով 2022 թվականի պետական բյուջեի կատարողականին՝ նա կարեւորել է նախատեսված ծրագրերի իրականացումը եւ նույնպես շեշտադրել կապիտալ ծախսերի կատարողականի աննխադեպ լինելը:
Գեւորգ Պապոյանը փաստել է, որ ԱԺ «Քաղաքացիական պայմանագիր» խմբակցությունը կողմ է քվեարկելու ՀՀ 2022 թվականի պետական բյուջեի կատարողականի հաշվետվությանը:
Հանձնաժողովականները դրական եզրակացություն են տվել քննարկված փաստաթղթին:
Հանձնաժողովի որոշմամբ հունիսի 23-ին՝ ժամը 11:00-ին, տեղի կունենա Ֆինանսավարկային եւ բյուջետային հարցերի եւ Գիտության, կրթության, մշակույթի, սփյուռքի, երիտասարդության եւ սպորտի հարցերի մշտական հանձնաժողովների համատեղ նիստ՝ ՀՀ կրթության, գիտության, մշակույթի եւ սպորտի նախարարությունում 2022 թվականի պետական բյուջեի տարեկան կատարման հաշվեքննության արդյունքների վերաբերյալ Հաշվեքննիչ պալատի ընթացիկ եզրակացությունը քննարկելու նպատակով:
ԱԺ
