Փաստաբան Արամ Օրբելյանը լրագրողների հետ զրույցում անդրադարձավ «Հայաքվեի» ներկայացրած Քրեական օրենսգրքում լրացումներ կատարելու նախագծին։ Առաջարկվում է Քրեական օրենսգրքում հոդվածներ ավելացնել՝ օրենքով արգելելու Արցախի հանձնումը որևէ այլ երկրի և արգելել Ցեղասպանության ճանաչումից հրաժարվելը։
«Հայաստանի Սահմանադրության ներածությունն ամրագրում է, որ ՀՀ Անկախության հռչակագիրը Սահմանադրության հիմքն է։ Եվ Հռչակագիրն ինքն է նախատեսում, որ հիմք է լինելու հետագա բոլոր սահմանադրությունների ու փոփոխությունների, որի հիմք է ՀՀ եւ Արցախի վերամիավորման մասին որոշումը։ Ինչ վերաբերում է այս նախագծին, նախագիծն այդ սահմանադրական դրույթի իրացումն է քրեադատավարական դաշտում։ Պարզ ասած՝ հետեւյալն է․ Սահմանադրությունն ու Անկախության հռչակագիրը որպես նպատակ նախատեսում են, որ Արցախը պետք է վերամիավորվի Հայաստանին եւ արգելում են դրան հակառակ որեւէ գործողություն։ Բայց դրա քրեադատավարական իրացումը, որի համար պետք է պատասխանատվության ենթարկվեն, այս նախագծով ենք իրացնում»,- ասա նա։
Ըստ Օրբելյանի՝ իրականում պետական դավաճանության հանցակազմը ներառում է այս գործողությունները, բայց քանի որ կարող են մեկնաբանության խնդիրներ առաջանալ, դրա համար նախատեսվել է սահմանադրական կարգի դեմ հանցագործությունների շարքում նաեւ այս երկու հանցակազմը ներառել։ «Մեկը՝ Արցախը որեւէ այլ պետության կազմում ՀՀ անունից ճանաչելը, մյուսը՝ Հայոց ցեղասպանության ճանաչումից հրաժարվելն ու դրա դեմ ուղղված գործողությունները»,- հավելեց Օրբելյանը։
Նա նշեց, որ ԿԸՀ ներկայացված «Հայաքվեի» դիմումը մերժելու հնարավորություն չի տեսնում։
Կարդացեք նաև
Ռոզա ՀՈՎՀԱՆՆԻՍՅԱՆ
