«Ես չեմ ուզում մեկնաբանել իմ հետ կապված զարգացումները, որովհետեւ երկիրն ակնհայտորեն շատ ավելի վատ վիճակում է, քան իմ դեմ քրեական աստառով քաղաքական հետապնդման հեռանկարը»,- այսօր լրագրողների հետ զրույցում ասաց ՀՀԿ փոխնախագահ Արմեն Աշոտյանը՝ պատասխանելով իր հնարավոր կալանավորման մասին հարցին:
Հիշեցնենք, մամուլում օրերս հրապարակումներ եղան, որ հավանական է` առաջիկա օրերին Արմեն Աշոտյանին կալանավորեն: Նրան ավելի վաղ պաշտոնական դիրքի չարաշահման եւ փողերի լվացման մեղադրանք էր առաջադրվել:
«Ես գիտեմ, որ իմ դեմ ինչ-որ գործողություններ են անում, ինչ-որ մարդկանց վրա ճնշումներ, խոստումներ, ի՞նչ նոր կուտ են գցել դաշտ՝ գործուն զղջո՞ւմ… ութ ամիս տեւում է գործը, ութ ամիս ես մեղադրյալ եմ, որեւէ քննչական գործողության, բացի առաջին օրվանից, ես չեմ մասնակցել: Ակնհայտ է, որ ինչ-որ բան են փորձում եփել. տարբեր մարդկանց վրա ճնշումներ, նստեցնել եւ այլն, որ կարողանան հաջորդ փուլին հասցնել: Եթե դրա նպատակն ինձ լռեցնելն է՝ եւ առաջ, եւ հետո, ես ոչ լռել եմ, ոչ էլ լռելու եմ: Եթե դրա նպատակը մնացածին վախեցնելն է, լիքը մարդ կա Հայաստանում, որ իրենցից չի վախենում: Խոսքը միայն քաղաքական դաշտի մասին չէ: Իսկ ես, որտեղ էլ լինեմ՝ քաղաքական աքսորում, թե քաղաքական կալանքում, ես իմ պայքարը շարունակելու եմ»,- ասաց ՀՀԿ փոխնախագահը:
Կարդացեք նաև
Նելլի ԳՐԻԳՈՐՅԱՆ
