Հայաստանի երեխաների առողջության հիմնադրամի 2-ամյակի կապակցությամբ ձևավորվել է նոր կազմով հոգաբարձուների խորհուրդ։ Այդ մասին որոշումը հաստատել է հիմնադրամի հիմնադիր Արմեն Մարտիրոսյանը:
Խորհրդում ներառվել են իրենց ոլորտներում առաջատար մասնագետներ, մասնավորապես՝
Արտակ Բեգլարյան՝ Արցախի պետական նախարարի խորհրդական – հոգաբարձուների խորհրդի նախագահ,
Արա Բաբլոյան՝ Արաբկիր ԲՀ-ԵԴԱԻ կառավարման խորհրդի նախագահ, գիտական ղեկավար,
Կարդացեք նաև
Ալեքսանդր Ուռումյան՝ Շենգավիթ ԲԿ-ի գլխավոր տնօրեն,
Արմեն Նուրբեկյան՝ ՀՀ կենտրոնական բանկի փոխնախագահ,
Արմինե Մկրտչյան՝ «ՄերակիՓալ» ընկերության տնօրեն, կազմակերպական զարգացման քոուչ,
Լուսինե Քասարջյան ՝ բարեգործական հիմնադրամների խորհրդատու,
Նարեկ Մկրտչյան՝ ՀՀ աշխատանքի և սոցիալական հարցերի նախարար,
Սամվել Մարտիրոսյան՝ տեղեկատվական անվտանգության փորձագետ։
Վերջերս տեղի ունեցավ խորհրդի 1-ին նիստը, որի ընթացքում խորհրդի նոր անդամներին ներկայացվեցին հիմնադրամի երկու տարվա գործունեության արդյունքները և ապագայում իրականացվելիք ծրագրերը։ Հոգաբարձուների խորհրդի անդամները հաստատեցին իրենց պատրաստակամությունը հնարավորինս աջակցել հիմնադրամի աշխատանքներին, որպեսզի Հայաստանի և Արցախի Հանրապետություններում բնակվող առողջական ծանր խնդիրներ ունեցող երեխաները լինեն առողջ և վայելեն իրենց անհոգ մանկությունը։
Հայաստանի երեխաների առողջության հիմնադրամի մասին
Հիմնադրամն օգնում է առողջական ծանր խնդիրներ ունեցող երեխաներին: Իր գործունեության երկու տարվա ընթացքում հիմնադրամը ստացել է շուրջ 51.000 նվիրատվություն, տրամադրել շուրջ 630.000.000 դրամի աջակցություն՝ օգնելով շուրջ 2225 երեխայի:
Հիմնադրամը նաև 6 նորագույն սերնդի բուժսարքավորում է նվիրաբերել ոլորտային բուժհաստատություններին՝ ապահովելով տարեկան շուրջ 2500 երեխայի պատշաճ հետազոտություն: Ֆինանսավորել է 9 բուժաշխատողի մասնակցությունը միջազգային վերապատրաստման կամ գիտաժողովի՝ նպաստելով բժշկության մեջ նորարար մեթոդների ներդրմանը։
Հիմնադրամի աջակցությամբ 2023 թ-ի հունիսի 1-ին Յոլյանի անվան արյունաբանական կենտրոնում բացվեց «Կարինայի անվան քաղցկեղի ժառանգական նախատրամադրվածության կլինիկան», որի նպատակն է նպաստել Հայաստանում և Արցախում երեխաների շրջանում քաղցկեղի վաղ հայտնաբերմանը, կանխարգելմանն ու արդյունավետ բուժմանը, արդյունքում՝ քաղցկեղի տարածվածության ու մահացության նվազեցմանը։
Հայաստանի երեխաների առողջության հիմնադրամ
