Երուսաղեմի հայերին պատկանող հողատարածքների վարձակալության մասին գործարքը հասցրել է աղմուկ հանել: Խոսքը «Կովերի պարտեզ» կալվածքի մասին է: Իսրայելական ծագմամբ մի գործարար մտադիր է հայերի բնակարանների եւ խանութների կրաքարե ամրոցը, ինչպես նաև ավտոկայանատեղին վերածել շքեղ հյուրանոցի:
Aravot.am-ը թեմայի վերաբերյալ մեկնաբանություն խնդրեց Երուսաղեմի Հայոց պատրիարքարանի նորանշանակ դիվանապետ Հայր Աղան Գոգչեանից (լուսանկարում): Հարցրինք, թե ով է կրում գործարքի պատասխանատվությունը, եւ խնդրի ինչ լուծում է տեսնում պատրիարքարանը: Հայր Սուրբն ասաց, որ առայժմ ձեռնպահ է մնում մեկնաբանություններ անելուց:
Իսկ ավելի վաղ ֆեյսբուքի իր էջում նա տարածել էր դիվանի մտահոգ հաղորդագրությունն, որ Հորդանանի Թագավորությունը ու Պաղեստինի կառավարությունը որոշել են սառեցնել Երուսաղեմի Հայոց Պատրիարք Ամեն․ Տ․ Նուրհան Արք․ Մանուկեանի պատրիարքական ճանաչումը այն բանից հետո, երբ «Կովերի պարտեզի» խնդրի հիմնական պատասխանատու կալվածքի տեսուչ նախկին Պարետ Ծ․ Վարդապետ Երէցեանը հեռացվել է պաշտոնից, կարգալույծ հռչակվել եւ վանքից արտաքսվել:
Գոհար ՀԱԿՈԲՅԱՆ
