ԱՄՆ-ը նպատակ է դրել դուրս մղել Ռուսաստանը Հայաստանի և Ադրբեջանի միջև հարաբերությունների կարգավորման գործընթացից: Այս մասին հայտարարել է Ռուսաստանի փոխարտգործնախարար Միխայիլ Գալուզինը «Ռոսիա 24» հեռուստաալիքի եթերում:
«ԱՄՆ-ը, իմ գնահատականով, փորձում է ամեն տեղ հասնել նույն բանին. մի կողմից՝ դուրս մղել Ռուսաստանին, մյուս կողմից՝ նեոգաղութատիրական ոճով իրեն ենթարկեցնել Ռուսաստանի գործընկեր և դաշնակից հանդիսացող անկախ պետություններին, խանգարել մեր գործընկերությանն ու դաշնակցայնությանը մեր բարեկամների ու հարևանների հետ: Դա է մշտապես եղել ԱՄՆ գլխավոր խնդիրը»,- ասել է Գալուզինը:
Նա նաև նշել է, որ Հայաստանի և Ադրբեջանի միջև հարաբերությունների կարգավորումը՝ եռակողմ հայտարարության հիմքի վրա, այլընտրանք չունի: Ընդ որում, նրա խոսքով, Ռուսաստանը դեմ չէ, որպեսզի մյուս երկրներն էլ իրենց ներդրումն ունենան հայ-ադրբեջանական կարգավորման գործում:
«Բայց դա պետք է լինի աջակցություն ոչ թե խոսքով, այլ գործով, և հիմնված լինի այլ սկզբունքային հիմնարար պայմանավորվածությունների վրա, որոնք ձեռք են բերվել առաջնորդների միջև, և որոնք, ինչպես մենք ենք տեսնում, ընդհանուր առմամբ բարեհաջող իրագործվում են,- ասել է Գալուզինը:- Համապատասխանաբար, որևէ այլ միջնորդների ջանքերը պետք է ավելացված արժեք ունենան հենց հայ-ադրբեջանական հարաբերությունների կարգավորման հիմնարար փաստաթղթերի իրականացման տեսանկյունից»:
Կարդացեք նաև
Պատրաստեց Վիկտորյա ԱՆԴՐԵԱՍՅԱՆԸ
