Թյուրքագետ Վարուժան Գեղամյանը տելեգրամյան իր ալիքում գրել է. «Մի փաստ էլ Թուրքիայի նոր արտգործնախարար Հաքան Ֆիդանից։ Վերջինիս գիտական թեզի վերնագիրն էր «Հետախուզության դերը արտաքին քաղաքականության մեջ»։ Հիշեցնեմ, որ Ֆիդանը մինչ արտգործնախարար նշանակվելը երկար տարիներ գլխավորում էր Թուրքիայի ազգային հետախուզական ծառայությունը։
Իսկ Ֆիդանի դոկտորական թեզը վերնագրված էր «Դիվանագիտությունը գիտելիքի դարում. տեղեկատվական տեխնոլոգիաների դերը համաձայնագրերի հաստատման գործում»:
Լուրջ պետություն»։
Հիշեցնենք՝ ավելի վաղ Վարուժան Գեղամյանը տելեգրամյան իր ալիքում գրել էր. «Իսկ հիմա երեկ Թուրքիայում ստեղծված նոր կառավարության մասին` հակիրճ:
Կարդացեք նաև
Առաջինը. հետախուզության պետ Հաքան Ֆիդանը, որը պատասխանատու էր Թուրքիայի սահմաններից դուրս ռազմական գործողությունների պլանավորման և իրականացման համար` Սիրիայից մինչև Արցախ, նշանակվեց արտաքին գործերի նախարար: Նա նաև Էրդողանի ամենահավանական ժառանգներից և այս նշանակումն էլ հենց այդ տրամաբանության մեջ է: Կասկած չկա, որ Թուրքիան շարունակելու է ագրեսիվ ռազմականացված արտաքին քաղաքականությունը:
Երկրորդ. ընտանիքի և սոցիալական ծառայությունների նոր նախարար է նշանակվել Բելգիայի թուրք Մահինուր Օզդեմիր Գյոքթաշը:
Նա ժամանակին քաղաքական ակտիվ գործունեություն էր ծավալում Բելգիայում, դարձել էր Բելգիայի խորհրդարանի գլխաշորով առաջին պատգամավորը: Սակայն 2015 թ.-ին նրա բելգիական քաղաքական կարիերան ավարտվեց. նրան հեռացրին բելգիական կուսակցությունից: Պատճառը Հայոց ցեղասպանության մերժումն էր»:
