«Ապրելու երկիր» կուսակցությունն այսօր 18 համայնքներում ունի ներկայացվածություն, որից 3 համայնքներում ստանձնել է կառավարումը։ Այս մասին այսօր հրավիրած ասուլիսում ասաց «Ապրելու երկիր» կուսակցության քաղխորհրդի անդամ Մեսրոպ Առաքելյանը։
«2021 թվականին մենք Նոյեմբերյան համայնքում ենք ստանձնել կառավարումը, նաեւ Տաթեւ համայնքում համատեղ կառավարում ենք ստանձնել այլ ուժի հետ։ Եվ նախորդ տարի մենք նաեւ հաղթեցինք Ալավերդի համայնքում։ Այսինքն՝ այն ճանապարհը, որը կուսակցությունը ստեղծման օրվանից որդեգրել էր՝ ընտրությունների միջոցով իրականացնել իշխանափոխություն, մեզ հաջողվել է իրականացնել։ Եվ արձանագրված արդյունքները խոսում են այն մասին, որ այս կարճ ժամանակահատվածում կուսակցությունը վայելում է հասարակության վստահությունը»,- ասաց Առաքելյանը։
Նրա խոսքով՝ իրենք հասարակությանն անում են աշխատելու առաջարկներ։ «Եվ կոնկրետ տեղերում ընտրությունների միջոցով իրականացնելով իշխանափոխություններ՝ մեր հաջորդ հանգրվանը Երեւանն է։ Եվ վստահ ենք, որ Երեւանում նույնպես առաջիկա ամիսների ընթացքում հասարակության հետ մեր ակտիվ աշխատանքի շնորհիվ հնարավորություն կունենանք ստանալ երեւանցու վստահությունը եւ փոխել Երեւանի դիմագիծը մեր աշխատանքի շնորհիվ»,- ասաց նա։
Ըստ Մեսրոպ Առաքելյանի՝ առաջիկայում ծրագիր են ներկայացնելու երեւանցիներին։ Նա ասաց, որ իրենց կարծիքով՝ համայնքների կառավարումը՝ առաջնահերթ համայնքի բնակիչների մասնակցությամբ պետք է լինի։
Կարդացեք նաև
Ըստ նրա՝ առաջիկայում կուսակցությունն առավել հանգամանքից կներկայացնի Երեւանի մասով թիմի կազմը։ «Մեզ համար կարեւոր է նաեւ կուսակցությունն ուժեղացնել այնպիսի անհատներով, ովքեր կարող են եւ պատրաստ են պատասխանատվություն ստանձնել Երեւանի կառավարման հարցով։ Մենք բաց ենք համագործակցության համար, բոլոր այն անձինք, ովքեր պատրաստ ենք ստանձնել պատասխանատվություն Երեւանում առկա խնդիրների լուծման ուղղությամբ, մենք պատրաստ ենք քննարկել թիմում ընդգրկելու հարցը եւ ներկայացնել այն ծրագրերը, որոնք էականորեն փոխելու են երեւանցու կյանքը»,- ասաց նա։
Ռոզա ՀՈՎՀԱՆՆԻՍՅԱՆ
