«Տեղ համայնքի ավագանու կայացրած սխալ որոշումները, Արավուս գյուղում 320 տոննա ջրամբարի քանդումը՝ պատճառաբանեցին, որ գույքագրված չի, կարող են քանդել, կադրային սխալ նշանակումների մասին եւ շատ հարցեր ներկայացրել եմ Սյունիքի մարզպետի հետ հանդիպման ընթացքում»,-Aravot.am-ի հետ զրույցում ասաց Տեղի ավագանու «Ապրելու երկիր» խմբակցության անդամ Մասիս Զեյնալյանը։
Վերջինիս խոսքով՝ Ռոբերտ Ղուկասյանը տեղում մի քանի հանձնարարականներ տվեց։ Բացի մարզային իշխանությանը դիմելուց՝ ավագանու ընդդիմադիր անդամը գրավոր ընթացակարգով դիմել է նաեւ տարածքային կառավարման եւ ենթակառուցվածքների նախարարությանը։
Aravot.am-ի զրուցակիցը կարեւորում է անվտանգային հարցերը, բայց համոզված է՝ համայնքին վերաբերող հարցերն էլ չպիտի անտեսվեն, որ հետագայում խնդիրների առաջ չկանգնեն։
«Գոհ եմ մարզպետից՝ այդքան ժամանակ տրամադրեց, լսեց ինձ, բայց դե գիտեմ, բաներ կան, որ իր գործառույթների մեջ չի մտնում»,-ասում է Aravot.am-ի զրուցակիցը։ Մասիս Զեյնալյանը մարզպետին նաեւ բողոքել է, որ իշխանական խմբակցության ներկայացուցիչները, համայնքի ավագանու նիստերի ժամանակ, անջատում են իր խոսափողը, որպեսզի բարձրաձայնված հարցերը չլսվեն։
Կարդացեք նաև
«Պարզաբանեցին՝ թե իբր ես օգտվելու ձեւը չգիտեմ, այդ դեպքում՝ ինչպե՞ս է լինում, որ որոշ հարցերի դեպքում չի անջատվում, միայն իրենց վերաբերյալ հարցերի դեպքում է անջատվում խոսափողը»,-հարցնում է ավագանու անդամը։
Ընդդիմադիր գործչին մտահոգող հերթական խնդիրը «Մարդը կարիքի մեջ» կազմակերպության կողմից տրամադրված օգնության բաշխումն է։ Որոշեցին տալ աշխարհազորայիններին։ «Աշխարհազորայինների մեջ մարդիկ կային, որ բանկերում ավանդ ունեն, բայց երկու անգամ այդ օգնությունը ստացել են։ Ինչո՞ւ․ թող տան կարիքավորներին»,-ասում է Մասիս Զեյնալյանն՝ ավելացնելով, որ հարցերը շատ են։
«Ամեն ինչը ապացույցներով ունեմ, փաստաթղթերը մոտս են, մի օր եկեք՝ կծանոթացնեմ»,-մեր զրույցը եզրափակեց «Ապրելու երկիր» խմբակցության ներկայացուցիչը։
Ավելացնենք, որ Aravot.am-ը գրավոր հարցում է ուղարկել Տեղի համայնքապետարան, պատասխանը ստանալուն պես՝ այն կհրապարակենք։
Արմեն ԴԱՎԹՅԱՆ
