Ազգային ժողովի տնտեսական հարցերի մշտական հանձնաժողովն այսօրվա նիստում դրական եզրակացություն տվեց «Հարկային ծառայության մասին» օրենքում փոփոխություններ կատարելու մասին նախագծին։
Հիմնական զեկուցող՝ Պետական եկամուտների կոմիտեի նախագահի տեղակալ Արթուր Մանուկյանը տեղեկացրեց․ «ՊԵԿ քննչական վարչությունը 2023 հունվարի մեկից իր ամբողջ կազմով ու գործառույթներով տեղափոխվել է Քննչական կոմիտե, սակայն Հարկային ծառայության մասին օրենքում մնացել են որոշակի դրույթներ, որոնք առնչվում են այդ գործառույթներին։ Այս նախագծով առաջարկում ենք այդ դրույթները համարել ուժը կորցրած»։ Ըստ Արթուր Մանուկյանի՝ այս փոփոխությամբ որեւէ աշխատակցի գործազրկության հարց չի կարող առաջանալ, քանի որ ՊԵԿ քննչական վարչությունն արդեն տեղափոխվել ու աշխատում է Քննչական կոմիտեում։
Արթուր Մանուկյանն, անդրադառնալով քննչական վարչության աշխատակիցների մասին հարցին, ասաց, որ փոխվել են միայն այն աշխատակիցները, որոնք ինքնավար պաշտոններ են զբաղեցրել։ «Քննչական կոմիտեի մասնագիտական կարողությունների մասին եզրակացություն կամ որեւէ կարծիք չեմ կարող տրամադրել, բայց մեր փորձառու անձնակազմը, որը տարիներ շարունակ քննչական գործառույթներով է զբաղվել, եղել են հարկային իրավախախտումների գծով քննիչներ։ Նրանք բոլորը տեղափոխվել են այնտեղ։ Եվ, կարծում եմ, իրենց փորձառությունը կներդնեն Քննչական կոմիտեի ընթացիկ աշխատանքների իրականացման համար»,- ասաց ՊԵԿ փոխնախագահը։
Ռոզա ՀՈՎՀԱՆՆԻՍՅԱՆ
