«Վիզաների ազատականացման թեման քննարկվում է եւ մեծամասամբ կամ գրեթե բոլոր դեպքերում աջակցություն է ստանում: Եվ, այդուհանդերձ, ինչպես տեղյակ եք, ԵՄ-ի կողմից նման որոշում կայացնելու համար կոնսենսուսային որոշում է պետք եւ կոնսենսուսի, դեռեւս ԵՄ-ի ներսում, այս թեմայի շուրջ, հասնել հնարավոր չի եղել»,- այսօր խորհրդարանում ԱԺ Եվրոպական ինտեգրացիայի եւ Ֆինանսավարկային հանձնաժողովի համատեղ նիստում հայտարարեց ԱԳ նախարար Արարատ Միրզոյանը՝ պատասխանելով իշխող «Քաղաքացիական պայմանագիր» խմբակցության պատգամավոր Սոնա Ղազարյանի հարցին:
Վերջինս հիշեցրել էր, որ մեկ տարի առաջ՝ 2021 թվականի բյուջեի կատարողականի քննարկման ժամանակ, ԱԳ փոխնախարար Պարույր Հովհաննիսյանը հայտարարել էր, թե ընդամենը մի քանի ամսից՝ սեպտեմբերին, այս հարցով արդեն բավական առաջընթաց կունենանք:
«Այս պահին ունենք «կոնսենսուս-1», բայց շարունակում ենք աշխատել»,- ասաց Արարատ Միրզոյանը՝ չբարձրաձայնելով թե ո՞ր երկիրը համաձայնություն չի տալիս:
Կարդացեք նաև
Ինչ վերաբերվում է նրան, որ վիզաների տրամադրման գործընթացն էլ ավելի է բարդացել՝ կապված նաեւ տուրիստական գործակալությունների «տարբեր ճարպկությունների» հետ, Արարատ Միրզոյանն ասաց, որ հարցն ԱԳՆ-ի տիրույթից դուրս է եւ վիզաների տրամադրում-չտրամադրումը ու դրանց ընտրության ընթացակարգերը ԵՄ երկրների իրավասության տիրույթում են:
Նելլի ԳՐԻԳՈՐՅԱՆ
