Հարցազրույց Հայաստանի ազգային ֆիլհարմոնիկ նվագախմբի եւ «Արամ Խաչատրյան» համերգասրահի փոխտնօրեն Ալինա Ենգոյանի հետ
– Հարգարժան Ալինա, հունիսի 6¬ին՝ մեծանուն Արամ Խաչատրյանի ծննդյան օրը, հանրապետությունում կմեկնարկեն կոմպոզիտորի 120-ամյակին նվիրված հոբելյանական միջոցառումները։ Կհնչեն նրա մշտապես սպասված ստեղծագործությունները՝ ոչ միայն մեր, այլեւ արտասահմանցի երաժիշտների մեկնաբանմամբ։ Հետաքրքիր է՝ ֆիլհարմոնիկը որեւէ նոր ձեւաչափ կամ անակնկալ ծրագրե՞լ է այդ առիթով։
– Մենք հոբելյանական միջոցառումների շարքը, իհարկե՝ ԿԳՄՍ նախարարության աջակցությամբ, կմեկնարկենք «Արամ Խաչատրյան» համերգասրահում, կոմպոզիտորի ծննդյան նախօրեին՝ հունիսի 5¬ին։ Այդ երեկո ֆիլհարմոնիկը կհնչեցնի Խաչատրյանի թիվ 2 սիմֆոնիան, հատվածներ «Սպարտակ» բալետից եւ «Հանդիսավոր պոեմը»։ Դիրիժորական վահանակի մոտ կլինի աշխարհահռչակ Ջորջ Փեհլիվանյանը։ Եթե հիշում եք՝ մաեստրոն հրավիրված էր նաեւ Խաչատրյանի 90-ամյակին նվիրված երեւանյան համերգին։ Երեկոյից անմիջապես հետո խաչատրյանական երաժշտությունն ու տրամադրությունը կշարունակվի համերգասրահի տանիքում, որտեղ առաջին անգամ կկայանա բացօթյա համերգ՝ ճանաչված ջազմեն Վահագն Հայրապետյանն իր Armenian Colors Qartet¬ի կվարտետի հետ։ Ներկայացվող խաչատրյանական երաժշտության ջազային մշակումների հեղինակը հենց Վահագն Հարապետյանն է։
Ի դեպ, մաեստրո Էդուարդ Թոփչյանն էլ հունիսի 6¬ին Մոսկվայի կոնսերվատորիայի մեծ դահլիճում կղեկավարի Ռուսաստանի Սվետլանովի անվան պետական ակադեմիական սիմֆոնիկ նվագախումբը՝ հնչեցնելով միայն խաչատրյանական երկեր, ինչն ըստ էության Արամ Խաչատրյանի ծննդյան 120-ամյակին նվիրված փառատոնի փակման գալա համերգն է։ Այն նկարահանվելու եւ հեռարձակվելու է «Կուլտուրա» հեռուստաալիքով։ Նշեմ, որ որպես մենակատար հրավիրված է ճանաչված թավջութակահար Նարեկ Հախնազարյանը։
Կարդացեք նաև
Տարվա ընթացքում ֆիլհարմոնիկը ոչ միայն հայ, այլեւ օտարերկրյա հանդիսատեսին կներկայացնի կոմպոզիտորի ստեղծագործությունների ողջ գունապնակը։ Խաչատրյանական փառատոնի շրջանակում առաջին անգամ հանդես կգանք մարզերում նույնպես. Սյունիքի մարզում՝ Մեղրի, Գորիս, Կապան, եւ Գյումրիում։
– Նշեցիք խաչատրյանական երկերով օտարերկրյա հանդիսատեսին ներկայանալու մասին, կմանրամասնե՞ք։
– Նվագախմբի արտասահմանյան հյուրախաղերի աշխարհագրությունը հետեւյալն է՝ ԱՄՆ, Կանադա, Հունաստան, Վրաստան։ Ողջ ընթացքում մեզ հետ կլինի ու որպես մենակատար հանդես կգա ամենուր սպասված ջութակահար Սերգեյ Խաչատրյանը։
– Մենք տեղեկություն ունենք, որ ֆիլհարմոնիկը ելույթ է ունենալու նաեւ հեղինակավոր Քարնեգի համերգասրահում…
– Այո, նույնիսկ կարող եմ օրը նշել. Նյու Յորքի հեղինակավոր այդ սրահում ֆիլհարմոնիկի համերգը կկայանա նոյեմբերի 15¬ին։
– Մի հարց էլ կուզեինք ուղղել, թեեւ ընթացիկ տարվա սկզբին ֆիլհարմոնիկի եւ «Արամ Խաչատրյանի» տնօրեն Նորայր Նազարյանը հանգամանալից ներկայացրել էր. խոսքը համերգասրահի հիմնանորոգման մասին է։
– Այս տարին հոբելյանական է նաեւ «Արամ Խաչատրյան» համերգասրահի համար. լրանում է 70 տարին։ Հավանաբար պարոն Նազարյանը ձեզ հայտնել էր, որ համերգասրահը 1953թ. շահագործվելուց հետո լիովին վերակառուցվել եւ նորացվել էր միայն 1981-83թթ., այնուհետեւ «Լինսի» հիմնադրամի աջակցությամբ՝ 2003թ.։ Համերգասրահն ունի տարաբնույթ խնդիրներ, որոնք այսօր հերթականությամբ իրենց լուծումն են ստանում։ Ուրախությամբ փաստեմ, որ արդեն իսկ հիմնանորոգվել են համերգասրահի սանհանգույցները, դիմահարդարման սենյակները, տեղադրվել է վերելակ։ Իսկ այժմ ԿԳՄՍ նախարարության աջակցությամբ վերանորոգվում են համերգասրահի աշխատասենյակները, դահլիճի բազկաթոռները։ Նշեմ, որ հաշվի են առնվել տարեցների եւ հաշմանդամություն ունեցող մարդկանց կարիքները, որպեսզի նրանց այցը համերգասրահ նույնպես լինի հարմարավետ ու ապահով։
Զրուցեց Սամվել ԴԱՆԻԵԼՅԱՆԸ
«Առավոտ» օրաթերթ
03.06.2023
