Վարչապետի աշխատակազմին 2022 թվականի պետական բյուջեով 11 ծրագրերի իրականացման համար հատկացվել է շուրջ 21․7 մլրդ դրամ, կատարվել է 10 ծրագիր, ծախսերը կազմել են շուրջ 20․8 մլրդ դրամ կամ նախատեսվածի 95․7 տոկոսը։ Այս մասին Ազգային ժողովում 2022 թվականի պետական բյուջեի կատարման քննարկումների ժամանակ ասաց վարչապետի աշխատակազմի ղեկավար Արայիկ Հարությունյանը։
«Նախորդ տարվա համեմատ վարչապետի աշխատակազմի պատասխանատվությամբ իրականացվող ծրագրերի գծով ծախսերը նվազել են 12․9 տոկոսով կամ 3․1 մլրդ դրամով, որը հիմնականում պայմանավորված է եղել վարչապետի լիազորությունների իրականացման ապահովման ծրագրի շրջանակներում կատարված ծախսերի նվազմամբ»,- ասաց նա։
Արայիկ Հարությունյանը հավելեց, որ աշխատակազմն իր առջեւ նպատակ է դրել շարունակել պետական ապարատի արդյունավետության բարձրացման աշխատանքները։ «Մեր գնահատմամբ՝ արդյունավետություն այս առումով ավելացել է։ Իհարկե, աշխատակազմի աշխատանքը տեսախցիկների առջեւ չէ, բայց կառավարության նիստերը նախորդ տարվա նիստերի հետ համեմատելով՝ դա ակնհայտ է դառնում։ Միայն խմբագրման գնացող նախագծերի կտրուկ նվազումը դրա վկայությունն է, սա նշանակում, է, որ ամբողջ գործընթացը, որը կազմակերպվում է ապարատի կողմից, ավելի արդյունավետ է իրականացվում, քան նախկինում։ ԱԺ աշխատանքը տարեցտարի ավելի արդյունավետ է դառնում։ Նախագծերի բազմակողմանի քննարկումները թույլ են տալիս ԱԺ լիագումար նիստեր բերել ավելի որակով նախագծեր»,- հավելեց նա։
Ռոզա ՀՈՎՀԱՆՆԻՍՅԱՆ
