Ըստ Հեռուստատեսության եւ ռադիոյի հանձնաժողովի նախագահ Տիգրան Հակոբյանի՝ ՀՌՀ-ի 2022 թվականի պետական բյուջեով ֆինանսական հատկացումները կազմել են շուրջ 325 մլն դրամ՝ ճշտված բյուջեի նկատմամբ՝ 324 միլիոն դրամ է, փաստացի կատարողականը՝ 99.6 տոկոս: Այս մասին հանձնաժողովի նախագահը տեղեկացրել է ԱԺ գիտության, կրթության, մշակույթի, սփյուռքի, երիտասարդության եւ սպորտի ու ֆինանսավարկային եւ բյուջետային հարցերի մշտական հանձնաժողովների՝ մայիսի 31-ի համատեղ նիստում:
Իրականացվել է 1 ծրագիր, 3 միջոցառում:
Տիգրան Հակոբյանը նշել է, որ հատկացված գումարի 85 տոկոսն աշխատավարձի ֆոնդն է: Թափուր հաստիքների պատճառով շուրջ 12 մլն դրամ վերադարձվել է պետական բյուջե: Հաշվետու տարում 7 դատավճռից 5-ը ՀՌՀ-ի օգտին է կայացվել: ՀՌՀ նախագահի հավաստմամբ 2024 թվականին նախատեսվում է իրականացնել մեդիագրագիտության վերաբերյալ նոր ծրագիր, քանի որ, ըստ նրա, մեդիագրագիտությունը բավականին ցածր տոկոս է կազմում:
Նշվել է, որ Հեռուստատեսության եւ ռադիոյի հանձնաժողովի` 2022 թվականի պետական բյուջեի նախագծով նախատեսված ծախսերի զգալի բաժինն ուղղված է եղել «Տեսալսողական մեդիայի ոլորտի կանոնակարգում» ծրագրին, որի նպատակն է հեռարձակվող լրատվության միջոցների ազատության, անկախության եւ բազմազանության ապահովումը:
Վարչապետի աշխատակազմի սփյուռքի գործերի գլխավոր հանձնակատար Զարեհ Սինանյանը ներկայացրել է իր ղեկավարած գրասենյակի 2022 թվականի բյուջեի կատարողականը:
Կարդացեք նաև
Հաշվետու տարում կառույցին հատկացվել է 578 մլն 945 հազար դրամ: Զեկուցողի խոսքով նախանշած ծրագրերը պատշաճ իրականացնելու համար անհրաժեշտ է եղել հատկացված գումարն ավելացնել եւս 186 մլն 919 հազար 100 դրամով: Ընդհանուր գումարը կազմել է 765 մլն 864 հազար 100 դրամ, ծախսը՝ 723 մլն 561 հազար 400 դրամ: Պետական բյուջե է վերադարձվել 42 մլն 302 հազար 700 դրամ:
«Քայլ դեպի տուն» ծրագրի իրականացմանը հատկացվել է 83 մլն 649 հազար 100 դրամ, որից 7 մլն 681 հազար 700 դրամ տնտեսված գումարը նվազեցվել է:
«Սփյուռքի երիտասարդ դեսպան» («Սփյուռքի երիտասարդ առաջնորդների վերապատրաստում») ծրագրի իրականացման համար հատկացվել է 11 մլն 806 հազար 700 դրամ, տնտեսվել է 2 մլն 330 հազար 800 դրամ:
Զարեհ Սինանյանը մանրամասն ներկայացրել է նաեւ «Աշխատանք սփյուռքի համայնքներում», «Հայրենադարձության ինտեգրման կենտրոն», «Աջակցություն Վրաստանի հայալեզու լրատվամիջոցներին» միջոցառումների իրականացման համար 2022 թվականի բյուջետային հատկացումները, ծախսերն ու խնայողությունները:
Զեկուցողը տեղեկացրել է, որ «Շինարարական եւ վերանորոգման աշխատանքներով պայմանավորված» միջոցառման շրջանակում ձեռք չեն բերվել տարածքի սպասարկման ծառայությունները, իսկ միջոցառման առցանց համակարգը ձեռք է բերվելու 2023 թվականին: Նրա խոսքով միջոցառման իրականացմանը հատկացված 22 մլն 928 հազար դրամը նվազեցվել է, միջոցառման ծախսը կազմել է 5 մլն 503 հազար 200 դրամ:
Ամբողջությամբ իրականացվել է «ՀՀ զարգացման գործընթացի Սփյուռքի ներուժի ներգրավում» ծրագիրը, որի համար հատկացված գումարը Կառավարության որոշման համաձայն ավելացվել է 179 մլն 579 հազար 400 դրամով: Իրականացված ծրագրի ծախսը կազմել է 365 մլն 22 հազար դրամ, տնտեսված 18 մլն 882 հազար դրամը վերադարձվել է պետական բյուջե:
2022 թվականի ընթացքում իրականացվել է 13 աշխատանքային գործուղում:
Հանրային հեռուստառադիոընկերության խորհրդի նախագահ Արա Շիրինյանը, ներկայացնելով խորհրդի՝ 2022 թվականի կատարողականը, նշել է, որ յուրաքանչյուր տարվա բյուջետային հատկացումները չեն գերազանցում նախորդ տարվա ֆինանսական հատկացումները: Զեկուցողն իր տեսակետն է ներկայացրել Հանրային հեռարձակողի դերի եւ նշանակության վերաբերյալ եվրոպական երկրներում:
Արա Շիրինյանը փաստել է, որ հանրային հեռուստաընկերության հաշվետու տարվա կատարողականը կազմել է 165 տոկոս, քանի որ Երեւանում կազմակերպել է Մանկական եվրատեսիլը: Նա նաեւ նշել է, որ 2015 թվականից մինչեւ օրս Հանրային հեռուստաընկերությունը տեխնիկապես չի վերազինվել:
ՀՀ ԱԺ
