ՀՀ հակակոռուպցիոն դատարանը մերժեց ՊԲ հրետանային դիվիզիոնի («Ցորի» զորամասի հրետանային դիվիզիոն) զոհված զինծառայողների ծնողների ներկայացուցիչ Լիպարիտ Սիմոնյանի՝ դատախազության անգործության հիմքով բողոքը։
Հիշեցնենք՝ դեռեւս 2022թ․-ի ապրիլին զոհված զինծառայողների ծնողները, մասնավորապես՝ ՊԲ հրետանային դիվիզիոնի («Ցորի» զորամասի հրետանային դիվիզիոն) զոհված զինծառայողների ծնողները հանցագործության մասին հաղորդում էին ներկայացրել՝ վարչապետ Նիկոլ Փաշինյանի հետեւյալ հայտարարության հետքերով․ «Այո, կարող էինք կանխել պատերազմը, եւ կունենայինք նույն վիճակը, բայց առանց զոհերի»։ Այս հաղորդումն ընթացքում կցվել էր ԳՇ նախկին պետ Մովսես Հակոբյանի վերաբերյալ քրեական գործին։
Լիպարիտ Սիմոնյանն այս մասին ասել էր․ «Մեր կարծիքով՝ ծնողների ներկայացրած հաղորդման վերաբերյալ դատախազությունը ցուցաբերել է անգործություն։ Համենայն դեպս, պարտավորություն ուներ նախկին քրեական դատավարության օրենսգրքի երկու հոդվածներով նախատեսված որոշումներից մեկը կայացնել, սակայն գրությամբ այն ուղարկել է Մովսես Հակոբյանին վերաբերող քրեական գործին կցելու ու համատեղ քննություն կատարելու։ Մինչդեռ այդ երկու գործերն էապես տարբերվում են, նույն թեմային չեն վերաբերվում։ Այդ գրությունն ուղարկելուց հետո մենք այս բողոքը ներկայացրինք դատարանին»։
Լիպարիտ Սիմոնյան
Դատարանը մերժեց գործը Մովսես Հակոբյանի վերաբերյալ քրեական գործից առանձնացնելու միջնորդությունը։ Փաստաբանից հետաքրքրվեցինք՝ որո՞նք են լինելու իրենց քայլերը, նա պատասխանեց․ «Քանի որ ծնողների հետ խոսել եմ, իրենք հակված են բողոքարկելուն»։ Մեր հիշեցմանը՝ երեկ հույս ունեիք, որ դատարանը բավարարելու է բողոքը, ուստի այս որոշումն ի՞նչ է նշանակում, ի՞նչ միտում կա, Լիպարիտ Սիմոնյանը պատասխանեց․ «Գիտեք՝ չեմ կարող ասել, որ միտում է, բայց, համենայն դեպս, ինձ համար ոչ օբյեկտիվ դատական ակտ է»։
Կարդացեք նաև
Տաթև ՀԱՐՈՒԹՅՈՒՆՅԱՆ
