Այսօր՝ մայիսի 31-ին, Ժողովրդավարության հայկական ֆորումի շրջանակներում տեղի ունեցավ պանելային քննարկում «ԶԼՄ կարգավորումը և դրա ազդեցությունը մամուլի ազատության վրա. հանրային շահերի կարգավորման և ԶԼՄ անկախության հնարավոր սահմանափակումների միջև եղած նուրբ սահմանի ուսումնասիրում» թեմայով:
Քննարկման մասնակիցներն էին ՀՀ արդարադատության նախարարության «Օրենսդրության զարգացման կենտրոն հիմնադրամի տնօրեն Տիգրան Դադունցը, «Հանրային կապերի և տեղեկատվության կենտրոն» ՊՈԱԿ-ի տնօրեն Գոռ Ծառուկյանը, Երևանի մամուլի ակումբի նախագահ Բորիս Նավասարդյանը և Միջազգային հանրապետական ինստիտուտի ծրագրերի համակարգող Աննա Նաղդալյանը:
Անդրադառնալով ոլորտի կարգավորմանը, Դադունցը նշեց, որ պետությունը չէ, որ լծակներով ու գործիքներով պետք է զբաղվի այդ հարցով, այլ պետք է ստեղծվեն մեխանիզմներ որպեսզի ոլորտը ինքնակարգավորվի:
«Մենք բացառում ենք կարգավորման մասին խոսելը, քանի որ ժողովրդավար պետություն ենք ու այդ արժեքներն ենք կրում: Պետության դերն այս փուլում այնպես անելն է, որ օրենսդրական մակարդակում ԶԼՄ-ները գնան այնպիսի ճանապարհով, որ ստեղծեն իրենց համար նման մեխանիզմներ կամ անդամակցեն արդեն իսկ գործող համակարգերին», – ասել է Դադունցը:
Կարդացեք նաև
Գոռ Ծառուկյանի խոսքով՝ Կառավարության կողմից հստակ արձանագրվել է, որ կա հաղորդակացության խնդիր, և գործարկվելու են հաղորդակարգեր, որոնք կօգնեն լուծել այդ խնդիրը:
«Դրանք ենթադրելու են հստակ կառուցակարգեր, հստակ մեխանիզմներ, թե որ գերատեսչությունը, գերատեսչության որ ստորաբաժանումը, ստորաբաժանման որ աշխատակիցը, կամ պաշտոնյան ինչ ժամկետներում, ինչ ծավալով, ինչ հերթականությամբ է պարտավոր իրականացնել հաղորդակցության գործընթաց: Այստեղ ոչ միայն հարցումներին պատասխանելու գործընթացն է, այլ նաև իր ֆունկցիաներից բխող, անհրաժեշտ, օգտակար և նույնիսկ օրենքով պարտադիր ինֆորմացիայի փոխանցման գործընացն է: Այսինքն անգամ եթե հարցում չլինի, ինքը պարտավոր է հանրության համար հետաքրքրություն ներկայացնող պետական աջակցության ծրագիրը պատշաճ ձևով և խելամիտ ժամկետներում հացնել շահառուին», – ասել է Ծառուկյանը:
«Պետք է ինքնակարգավորումը դարձնել ինստիտուտոցիոնալ լուրջ հիմքերի վրա դրված մի ֆենոմեն: Այս գործընթացում մասնակցություն, սակայն ոչ ազդեցություն ու միջամտություն, պետք է ունենա նաև պետությունը: Հիմնական գործոնը պետք է լինի խրախուսումն այն լրատվամիջոցների, որոնք պատրաստ են աշխատել՝ հաշվի առնելով հանրային շահը: Դրա համար կան բազմաթիվ չափորոշիչներ և մեխանիզմներ, սակայն առանց խրախուսման միջոցների Հայաստանում դա հնարավոր չի լինելու։ Նախաձեռնողների պարտականությունն է հնարավորինս ճանաչելի դարձնել այդ բոլոր ինքնակարգավորման մեխանիզմները, որոնք գործում են կամ կարող են գործել: Այս առումով կարևոր ներդրում կարող են ունենալ միջազգային դոնորները: Պետք է աշխատանք լրատվամիջոցների շրջանում, որպեսզի նրանք հասկանան, թե ինչումն է առավելությունը միանալու այդ ինքնակարգավորմանը»,- ասաց Բորիս Նավասարդյանը:
Քննարկումը վարում էր «Ազատություն» ռադիոկայանի հայկական ծառայության ղեկավար Հեղինե Բունիաթյանը:
Իրազեկ քաղաքացիների միավորում
