Ժողովրդավարության հայկական երկրորդ ֆորումում քաղաքագետ Արեգ Քոչինյանը հարց ուղղեց վարչապետ Նիկոլ Փաշինյանին։ «Ես կուզեմ խոսենք սենյակում առկա փղից, եւ այդ փիղը Հայաստանի արտաքին ընտրությունն է։ Հայաստանը շարունակում է հանդիսանալ ՀԱՊԿ, ԵԱՏՄ անդամ, սրանք միություններ են, որտեղ բոլոր մասնակիցները, բացի Հայաստանից, առավել ոչ ժողովրդավարական պետություններ են, եթե դիվանագիտորեն արտահայտվենք։ Այստեղ դուք խնդիր չեք տեսնո՞ւմ, մեր ժողովրդավարության համար խնդիր չեք տեսնո՞ւմ։ Դուք չեք կարծո՞ւմ, որ գտնվելով ավտորիտար պետությունների ճամբարում՝ մենք ինքներս ենք ստեղծում վտանգ մեր ժողովրդավարության եւ ապագայի համար»,- ասաց Քոչինյանը։
Նիկոլ Փաշինյանն ի պատասխան ասաց․ «Ես ուզում եմ մեր ոչ վաղ անցյալի մասին խոսել։ 2021 թվականի մայիսի 10-ին ուժի մեջ է մտնում իմ հրաժարականը, եւ խորհրդարանը լուծարվում է։ Այսինքն՝ երկրում փաստացի չկա ոչ կառավարություն, ոչ խորհրդարան։ Եվ մայիսի 12-ին տեղի է ունենում Ադրբեջանի ներխուժումը Սոթք-Խոզնավար հատվածում։ Եվ զրո ռեակցիա Հավաքական անվտանգության պայմանագրի կազմակերպության կողմից։ Այժմ քրեական գործով կան բարձրաստիճան զինվորականներ կալանավորված։ Ինչի՞ համար են նրանք կալանավորված, որովհետեւ պարզվում է, որ նրանք ոչ մի գործողություն չեն ձեռնարկել Հայաստանի ինքնիշխան տարածքը պաշտպանելու համար։ Ու նրանք չունեն բացատրություն։ Եթե 2021 թվականին մեր ռեակցիաները լինեին գծային, մենք եւ ժողովրդավարությունը կկորցնեինք, եւ պետությունը կկորցնեինք։ Եվ ասվածի մեծ ոչ մի չափազանցություն չկա»։
Փաշինյանը հավելեց, որ երբ Ուկրաինայի իրադարձությունները սկսվել էին, Հայաստանը փորձում էր բալանսավորված որոշակի դիրքորոշումներ ունենալ իր քվեարկություններով։ «Այդ պայմաններում կար մի իրավիճակ, երբ դա որոշակի գոհունակություն էր ձեւավորում բոլոր գործընկերների մետ, բայց ես նաեւ հրապարակային ասել, որ ակնհայտ է՝ ժամանակի ընթացքում Հայաստանը մանեւրի դաշտը նեղանում է։ Եվ սա շատ լուրջ մարտահրավեր ու պրոբլեմ է բոլորիս համար, առավել եւս Հայաստանի համար՝ խոցելիությունը հաշվի առնելով»,- հավելեց Փաշինյանը։
Ռոզա ՀՈՎՀԱՆՆԻՍՅԱՆ
