«Ապագա Հայկականը» շարժման նախաձեռնող, «Ավրորա» մարդասիրական նախաձեռնության համահիմնադիր, Արցախի նախկին պետնախարար Ռուբեն Վարդանյանը ֆեյսբուքյան իր էջում գրում է.
Ադրբեջանն ակտիվորեն ապատեղեկատվություն է տարածում Արցախի Պաշտպանության բանակի կողմից իբր «հարձակումների» մասին, որի նպատակը կարող է լինել հնարավոր ռազմական էսկալացիայի նախապատրաստումը։ Միտումնավոր կերպով լրատվական դաշտը հեղեղվում է կեղծ լուրերով՝ ռազմական ագրեսիան որպես պատասխան քայլ ներկայացնելու նպատակով։
Մենք պետք է ասենք՝ սա սադրանք է։ Ըստ էության, այնպիսին, ինչպիսին Գլեյվիցի միջադեպը Երկրորդ համաշխարհային պատերազմի նախօրեին, երբ լեհական համազգեստով էսէսականները իբր թե հարձակվեցին գերմանական ռադիոկայանի վրա և հեռարձակեցին հակագերմանական հայտարարություն:
Այս կեղծիքը «սպիտակ թելով է կարված», ցանկացած ողջամիտ մարդու համար պարզ է, որ Արցախի բանակի կողմից որևէ ռազմական հարձակում չի կարող լինել։
Կարդացեք նաև
Քանի որ պաշտոնական Երևանը լռում է, ապա ես՝ որպես հանրային անձ, ամենայն պատասխանատվությամբ ուզում եմ հայտարարել ողջ աշխարհին․ Արցախի բանակը «միջադեպերի» մեջ մեղադրելու փորձերը ոչ այլ ինչ են, քան ապատեղեկատվություն և հայկական Արցախի դեմ Ադրբեջանի ռազմական ագրեսիայի նոր փուլ հրահրելու փորձ։
Մենք տեսնում ենք այս սադրանքը և ցանկանում ենք, որ աշխարհն էլ մեզ հետ այն տեսնի։
Հիշեցնեմ, որ առնվազն մինչև 2025 թվականի նոյեմբերի 10-ը ուժի մեջ է Եռակողմ հայտարարությունը, ըստ որի, Արցախի անվտանգությունը պետք է ապահովի նաև ռուսական խաղաղապահ առաքելությունը։ Արցախի Պաշտպանության բանակը պատրաստ է հակահարված տալ, իսկ իրավիճակի էսկալացիայի դեպքում ագրեսորը ստիպված կլինի մեծ կորուստներ կրել։ Ավելին, անմիջական ռազմական ագրեսիայի դեպքում մենք պատրաստ ենք բավական արդյունավետ ոչ համաչափ պատասխան միջոցներ կիրառել։
Միևնույն ժամանակ, կարևոր է գիտակցել, որ հակամարտությունն ունի խաղաղ լուծում՝ երկկողմ բանակցությունների միջոցով։ Արցախը պե՛տք է վերադարձնել բանակցությունների սեղանի շուրջ։ Հիմա մենք հստակ կարող ենք արձանագրել, որ պաշտոնական Երևանը, որը նախկինում ինչ-որ կերպ փորձում էր միջազգային մակարդակով քննարկել Արցախի հարցը, վերջնականապես հրաժարվել է շարունակել Արցախը պաշտպանելուց։ Բայց դրանով Արցախի 120.000 հայերը չեն անհետանում, որոնք հստակ հայտարարել են, որ չեն ցանկանում ապրել Ադրբեջանի կազմում և արդեն իսկ իրացրել են իրենց ինքնորոշման իրավունքը 1991 թվականի օրինական հանրաքվեի միջոցով։
35 տարվա անկախության ընթացքում Արցախի Հանրապետությունում ձևավորվել և գործում են դե յուրե անկախ պետությանը բնորոշ ժողովրդավարական բոլոր ինստիտուտները՝ մրցակցային հիմունքներով ընտրվող նախագահ և խորհրդարան, անկախ դատարան, իրավապահ համակարգ և այլն: Արցախի ժողովուրդն ամեն ինչ արել է՝ այդ առումով միջազգային իրավունքի ամենախիստ պահանջներին համապատասխանելու համար: Ու հիմա Արցախը պատրաստ է և պետք է դառնա լիիրավ բանակցային կողմ, բայց այդ բանակցությունները պետք է վարվեն միջազգային միջնորդությամբ՝ անվտանգության հուսալի երաշխիքների առկայությամբ, ոչ թե զենքը ճակատին ուղղած:
Արցախը ջանք չի խնայելու սեփական անկախությունը պաշտպանելու համար։
Սադրանքն ու ռազմական էսկալացիան ընդհանուր խնդիրը համակարգված լուծելու միջոց չեն: Այն հնարավոր է քաղաքակիրթ ձևով լուծել: Եվ պատմության մեջ մնալ որպես առաջնորդներ, որոնք իրենց սերունդների համար ոչ թե բազմապատկել, այլ պակասեցրել են չարիքը Երկրի երեսից:
« պաշտոնական Երևանը (…) վերջնականապես հրաժարվել է շարունակել Արցախը պաշտպանելուց։ »
…………………………………………………………………………………………..
Ստորագրուած հակազդեցութիւն՝
ա. «Վերջնականապէս» բառը, տեղին չէ:
բ. Այս պահի դրութեամբ, Երեւանը ԱՆԿԱՐՈՂ է պաշտպանելու Արցախը:
Նա փորձում է միայն պաշտպանել Հայաստանը: Եւ դա իսկ անելու բաւարար կարողութիւնը չունի:
գ. «Պաշտօնական Երեւանը», ձեռք բերեց 09 Նոյեմբեր 2020ի՝ զինադադարի պայմանագիրը:
Այս պայմանագիրը, ստորագրած է պաշտօնական Մոսկուան:
Եւ այդ պայմանագրի հիման վրայ, պաշտօնական Մոսկուան ՊԱՐՏԱՒՈՐ է պաշտպանելու Արցախը:
Ըստ իր այդ ստորագրած պայմանագրի տառացի բովանդակութեան, պաշտօնական Մոսկուան ստիպուած է, պարտաւոր է, ի միջի այլոց՝ բանալու եւ բաց պահելու Բերձորի միջանցքը:
Հետեւաբար, Պարոն Վարդանյանը, որ ամենայն հաւանականութեան՝ «Ռուսաստանի մարդ»ն է, պաշտօնական Մոսկուայի կողմէ յատուկ գործուղուած՝ Արցախ, թող բարեհաճի իր գանգատները ուղղել՝ պաշտօնական Մոսկուային:
ԿԸ ԲԱՒԷ՛, ԺՈՎՈՒՐԴԸ ՄՈԼՈՐՈՒԹԵԱՆ ՄԱՏՆԷՔ:
ԿԸ ԲԱՒԷ ԺՈՂՈՎՈՒՐԴԸ ՉԱՐԱՉԱՐ ԳՈՐԾԱԾԷՔ, ՔԱՂԱՔԱԿԱՆ ՆՊԱՏԱԿՆԵՐՈՎ:
Եթէ Մոսկուան պիտի զբաղուի Արցախով եւ Հայաստանով, միմիայն եթէ՝ Փաշինյանի վարչակարգը վերջ գտնէ, ապա Մոսկուան ալ իր գանգատները թող ուղղէ՝ Հայաստանի եւ Արցախի մէջ իրեն ենթակայ քաղաքական ուժերուն: Որոնց ղեկավարները, կարգին խլէզներ են:
Մ. Հայդուկ Շամլեան