Ազգային ժողովի պաշտպանության եւ անվտանգության հարցերի մշտական հանձնաժողովի նիստում այսօր դրական եզրակացություն տրվեց կառավարության ներկայացրած «Ոստիկանությունում ծառայության մասին» օրենքում լրացումներ եւ փոփոխություններ կատարելու մասին նախագծին։
Արփինե Սարգսյան
Հիմնական զեկուցող Ներքին գործերի նախարարի տեղակալ Արփինե Սարգսյանը ներկայացրեց նախագիծը։ «Օրենքի նախագիծը վերաբերում է ոստիկանության համակարգում շատ կարեւոր բովանդակային եւ կառուցվածքային փոփոխության։ Որոշում կայացվեց ունենալ հետեւյալ տրամաբանությունը՝ քրեական ոստիկանության գլխավոր վարչություն կենտրոնական ապարատում, մարզային մակարդակում՝ ուղղաձիգ ենթակայությամբ ստորաբաժանումներ, ինչպես նույն Պարեկային ծառայությունը, որն այս պահի դրությամբ արդեն իսկ այդ ռեժիմով է աշխատում, նույն համայնքային ոստիկանությունը, նույն նաեւ գվարդիան։ Պարզապես նախատեսում ենք, որ գվարդիան ամեն մարզում չունենանք, այլ երեք հատվածի բաժանենք հանրապետությունում։ Քրեական ոստիկանության մասով, երբ ձեւավորումը լինի, ոստիկանության մարզային վարչությունները կդադարեցնեն իրենց գործունեությունը եւ կլուծարվեն։ Առաջարկում ենք հետեւյալ տրամաբանությամբ լուծում ունենալ՝ տարածքային քրեական ոստիկանության ստորաբաժանումների ձեւավորման բաց մրցույթ եւ պարեկային ծառայության օրինակով կադրերի համալրում՝ բացառապես նախնական մասնագիտական կրթական խողովակով անցնելու պայմաններում։ Այսինքն՝ կհայտարարենք բաց մրցույթ, մեր մյուս քաղաքացիները, ինչպես նաեւ ոստիկանական համակարգի կադրերը կկարողանան դիմել եւ հատուկ պատրաստման պրոցեսն անցնելուց հետո նշանակվել մարզային մակարդակում քրեական ոստիկանության մարզային ստորաբաժանման կազմում։ Սա թույլ կտա ունենալ նոր թարմ շունչ քրեական ոստիկանության կտրվածքով եւս, որովհետեւ հատկապես սպեցիֆիկ հանցակազմերի դեպքում, օրինակ, կիբերհանցագործության, կարիք ունենք նեղ մասնագիտացում ունեցող օպերատիվ աշխատանք իրականացնող աշխատակիցների, որոնք այս պահի դրությամբ շատ չեն ոստիկանության համակարգում»,- ասաց նա։
Արփինե Սարգսյանի խոսքով՝ այս ստորաբաժանման ձեւավորմամբ այլ ստորաբաժանումներից կադրերի արտահոսք չի լինի, քանի որ այնպիսի չափանիշներ են դրվել, որ այդ խնդիրը չլինի։ «Եթե պարեկային ոստիկանությունում կարող ես աշխատանքի անցնել միջնակարգ կրթության պայմաններում, քրեական ոստիկանությունում կարող ես աշխատանքի անցնել, եթե բացառապես ունես բակալավրի աստիճան։ Այսինքն՝ ինչ-որ մի կրիտերիա մենք սահմանել ենք, որպեսզի դրանից հետո նոր մարդիկ կարողանան դիմել աշխատանքի անցնելու համար»,- ասաց նա՝ հավելելով, որ ղեկավար կազմը եւս մրցույթով կընտրվի։ Նախատեսվում է ծրագիրը սկսել հոկտեմբերի 1-ից։
Ոստիկանության մյուս ստորաբաժանումներ էլ, որտեղ մրցույթ չի լինի, ըստ Արփինե Սարգսյանի, ատեստավորում կանցկացվի, որպեսզի պաշտոնների լինեն այն անձինք, ովքեր համապատասխանում են մասնագիտական չափանիշներին։
Կարդացեք նաև
Ռոզա ՀՈՎՀԱՆՆԻՍՅԱՆ
