Եվրոպական խորհրդի նախագահ Շառլ Միշելը կարևորել է Բաքվի երկխոսությունը «նախկին ԼՂԻՄ-ում բնակվող հայերի» հետ:
«Բաքվի և նախկին ԼՂԻՄ-ում ապրող հայերի միջև երկխոսությունը՝ նրանց իրավունքների և անվտանգության շուրջ, այժմ չափազանց կարևոր է։ Կարևոր է զերծ մնալ մաքսիմալիստական դիրքորոշումներից և ձգտել երկխոսության։ Ավելի քան 30 տարվա հակամարտությունից հետո վերքերը անմիջապես չեն լավանում։ Անհրաժեշտ են համարձակ որոշումներ»,-թվիթերյան գրառմամբ նշել է Շառլ Միշելը:
Մեկ այլ թվիթում Շառլ Միշելը գրել է, որ անհամբերությամբ սպասում է Քիշնևում Ադրբեջանի նախագահի և Հայաստանի վարչապետի հետ քննարկմանը հայ-ադրբեջանական կարգավորման շուրջ:
«Կարևոր է վերահաստատել միմյանց ինքնիշխանության և տարածքային ամբողջականության նկատմամբ հարգանքը և առաջընթացի հասնել սահմանազատման, ինչպես նաև սահմանամերձ տարածքներում ռիսկերը նվազեցնելու ուղղությամբ»,- գրել է նա:
Կարդացեք նաև
ԵՄ խոսնակի հայտարարությունը կարգավորման գործընթացի վերաբերյալ
Հայաստան-Ադրբեջան հարաբերությունների կարգավորման գործընթացը վերջին մեկ ամսվա ընթացքում աշխուժացել է, ինչը Եվրամիությունը ողջունում է։ ԵՄ-ն կարծում է, որ կարևոր է պահպանել այս պատմական թափը և խուսափել քայլերից, ներառյալ թշնամական հռետորաբանությունից, որոնք կարող են վտանգել խաղաղության գործընթացը:
Մայիսի սկզբին ԱՄՆ-ում կայացած` խաղաղության պայմանագրի շուրջ բանակցություններից հետո, մայիսի 14-ին Բրյուսելում տեղի ունեցավ առաջնորդների հանդիպումը՝ հունիսի 1-ին Մոլդովայի Հանրապետության Քիշնևում նախատեսված մեկ այլ հանդիպումից առաջ։ Հայաստանի և Ադրբեջանի ղեկավարները հանդիպել են նաև Մոսկվայում։
Բրյուսելում նրանք կենտրոնացել են մի քանի առանցքային թեմաների վրա, ինչպիսիք են սահմանային խնդիրները, կապը, մարդասիրական խնդիրները և նախկին` Լեռնային Ղարաբաղի Ինքնավար Մարզի տարածքում ապրող հայերի իրավունքներն ու անվտանգությունը:
Այդ ժամանակից ի վեր ղեկավարները հրապարակավ վերահաստատեցին իրենց աներկբա հավատարմությունը 1991թ. Ալմաթիի հռչակագրին և Հայաստանի (29,800 քառ․ կմ) և Ադրբեջանի (86,600 քառ կմ) համապատասխան տարածքային ամբողջականությանը:
Մենք ողջունում ենք մայիսի 22-ին ՀՀ վարչապետ Նիկոլ Փաշինյանի խիզախ հայտարարությունը և երկկողմ սահմանի սահմանազատման ուղղությամբ աշխատելու Հայաստանի հստակ պատրաստակամությունը։ Մենք ողջունում ենք նաև Ադրբեջանի նախագահ Իլհամ Ալիևի՝ մայիսի 25-ի հայտարարությունը։
Քանի որ այս զգայուն հարցերի շուրջ աշխատանքը շարունակվում է, կարևոր է քայլեր ձեռնարկել վստահություն ձևավորելու, բարեխղճորեն ներգրավվելու և առաջնորդություն ցուցաբերելու համար՝ համապարփակ կարգավորմանը վերաբերող բոլոր հարցերի լուծումների հասնելու համար:
Չնայած հակամարտությունների բարդ պատմությանը և անցյալի դժգոհություններին, բոլոր հարցերը պետք է լուծվեն բացառապես խաղաղ ճանապարհով, երկխոսության միջոցով։
ԵՄ-ն հանձնառու է աջակցել կողմերին այս գործում:
Dialogue between Baku and Armenians living in former NKAO on their rights & security is now crucial.
— Charles Michel (@CharlesMichel) May 30, 2023
Important to refrain from maximalist positions and aim for dialogue. After more than 30 years of conflict, wounds take time to heal. Courageous decisions are needed.@EPCMoldova
