Այսօր լրագրողների հետ ճեպազրույցում փոխվարչապետ Մհեր Գրիգորյանն անդրադարձավ տարածաշրջանային հաղորդակցությունների ապաշրջափակման հարցին։ Ըստ նրա՝ երկաթուղին ենթակառուցվածքային շատ ավելի արդյունավետ լուծում կարող է լինել տարածաշրջանի համար։
«Մենք ուզում ենք լուծումներ, որոնք կամրապնդեն և կավելացնեն Հայաստանի դերը տարածաշրջանում՝ որպես լոգիստիկ հանգույց։ Երկաթուղային տարբերակն այս պահին ամենահավանականն է թվում։ Եթե նայենք տարածաշրջանում երկաթգծային ենթակառուցվածքներին, պարզ է դառնում, որ առանձին հատվածների վերականգնմամբ տարածաշրջանային մակարդակով մենք ստանում ենք լուրջ լոգիստիկ լուծում։ Վերականգնումը շատ նախնական հաշվարկներով կարող է մոտ 2-3 տարի տևել»,- ասաց Մհեր Գրիգորյանը։
Փոխվարչապետը նաեւ տեղեկացրեց, որ այս շաբաթ հնարավոր է կայանա Հայաստանի, Ռուսաստանի և Ադրբեջանի փոխվարչապետերի մակարդակով եռակողմ խմբի հանդիպումը։ Այդ հանդիպման ժամանակ, ըստ նրա, քննարկվելու են միայն ապաշրջափակման հարցերը։
Ռոզա ՀՈՎՀԱՆՆԻՍՅԱՆ
