Կարմիր Խաչի միջազգային կոմիտեի խորհրդատվությամբ ու աջակցությամբ ստեղծվել է Վայոց Ձորի մարզի Ջերմուկ քաղաքի Առողջության կենտրոնի անհետաձգելի բուժօգնության բաժանմունքը։ Կենտրոնի հերթապահ բժիշկ Ռազմիկ Հարությունյանը լրագրողների հետ զրույցում ասաց, որ բաժանմունքի կարիքը խիստ զգացվում էր։
«Բաժանմունքը ստեղծվել է Կարմիր խաչի անմիջական միջնորդությամբ, նախկինում չենք ունեցել բաժանմունքը, որը վերանորոգման արդյունքում է ստեղծվել։ Հիվանդները նախկինում անբարեկեցիկ պայմաններում էին սպասարկվում, հիմա պայմանները փոխվել են։ Ներկա պահին ունենք երեք անհետաձգելի մահճակալ, մեկն էլ կողմնակի»,- ասաց նա։ Բարեգործական միջոցներով բաժանմունքը նաեւ հագեցել է նորագույն սարքավորումներով։
Սեպտեմբերյան պատերազմի օրերին նման բաժանմունք չի եղել Ջերմուկի Առողջության կենտրոնում, քաղաքը մասնագիտացված հիվանդանոց նույնպես չունի, եւ դժվար է եղել սպասարկել առաջնագծում վիրավորում ստացած ու Ջերմուկ տեղափոխված զինվորներին։
Բժշկի խոսքով՝ ծրագիր կա, որ քաղաքում հիվանդանոց պետք է կառուցվի։ «Այդ օրերին կարողացել ենք ինչ-որ օգնություն ցուցաբերել մեր անձնակազմով։ Այս բաժանմունքի կարիքը միշտ էլ կա, եւ այս բաժանմունքը վերանորոգվեց սեպտեմբերյան պատերազմից հետո։ Մենք այսօր Ջերմուկում միակ բուժհիմնարկն ենք, անում ենք այն, ինչ մեր հնարավորության սահմաններում է, դրանից հետո կամ հիվանդները տեղափոխվում են Երեւան կամ Վայքի բուժմիավորում։ Սեպտեմբերյան պատերազմի օրերին այստեղ միայն փոքր ու անհետաձգելի դեպքերն ենք սպասարկել՝ արյունահոսությունների դադարեցում, վիրակապեր։ Այսինքն՝ երբ առաջնագծից վիրավորները տեղափոխվել են այստեղ, այդ օգնություն ցուցաբերվել է, այնուհետեւ շտապ օգնության մեքենաներով տեղափոխվել են մարզային հիվանդանոցներ եւ Երեւան»,- մանրամասնեց բժիշկը։
Կարդացեք նաև
Ռազմիկ Հարությունյանն ասում է, որ Ջերմուկը, սահմանամերձ լինելուց բացի, նաեւ զբոսաշրջային քաղաք է, եւ կարիք ունի նորագույն ու ավելի մասնագիտացված հիվանդանոց ունենալու։ «Օրինակ՝ զբոսաշրջիկը կարող է վնասվածք ստանալ, եթե այստեղ բուժօգնություն չստանա, հաջորդ անգամ չի փորձի գալ մի տեղ, որտեղ բուժծառայություն չկա»,- հավելեց նա։
Ռոզա ՀՈՎՀԱՆՆԻՍՅԱՆ
