Բերձորի միջանցքի փակ լինելու հետեւանքով այն արցախցիները, ովքեր չեն կարողանում վերադառնալ Արցախ, այսօր էլ շարունակվում են բնակվել Գորիս քաղաքի հյուրանոցներում։ Այս մասին լրագրողներին ասաց Սյունիքի մարզպետ Ռոբերտ Ղուկասյանը։ «Նրանց թիվը չեմ կարող հստակ ասել, մինչ օրս շարունակում են մնալ Գորիսի հյուրանոցներում եւ ապահովված են սնունդով։ Նաեւ Կարմիր խաչի միջազգային կոմիտեն է միշտ իրենց կողքին։ Բնականաբար, դա երբեք չի կարող կոմպենսացնել այն, որ մարդիկ զրկված են իրենց տուն գնալու, շատ հաճախ իրենց երեխաներին տեսնելու հնարավորությունից»,- ասաց նա։
Ռոբերտ Ղուկասյանի խոսքով՝ Սյունիքում են բնակվում նաեւ Աղավնոյից ու Բերձորից տեղահանված բնակիչներ։ «Մարզպետարանին հայտնի չէ գեթ մեկ ընտանիք, որին անձամբ ես կամ մարզպետարանի ղեկավար անձնակազմն այցելած եւ աջակցած չլինի։ Իրենք ունեն նաեւ բնակարանների գնման վկայականներ։ Այստեղ հարցը մի քիչ հոգեբանական է, մենք ուզում ենք, որ մարդիկ վերջնականապես ընտրեն, թե որտեղ են ուզում բնակվել։ Շատ լավ կլինի, որ մարդիկ իրենք վերջնական ընտրեն այն բնակավայրը, որտեղ կուզեն բնակվեն։ Այն, որ Սյունիքում ավելի մեծ թվով արցախցիներ կան, կարծում եմ, դա պայմանավորված է նրանով, որ իրենք ուզում են հնարավորինս մոտ լինել այն տարածքին, որտեղից ստիպված են եղել դուրս գալ»,- ասաց նա։
Ռոբերտ Ղուկասյանը նաեւ հավելեց, որ սյունեցին արցախցուն աջակցում է բոլոր հարցերում։ «Ողջ Սյունիքը կանգնած է արցախցիների կողքին, մի մասն արդեն ընդունվել են աշխատանքի։ Մենք կանենք առավելագույնը, որպեսզի մարդկանց ցավը մեղմենք»,- ասաց նա։
Ռոզա ՀՈՎՀԱՆՆԻՍՅԱՆ
