Շիրակի մարզում այսօր դպրոցին հրաժեշտ է տվել 1710 շրջանավարտ։ Նրանցից 57-ը հավակնում են ոսկե մեդալի։
«Վերջին զանգ» տոնական միջոցառմանն այսօր մարզային իշխանությունների հետ մասնակցել է նաև գերիների հարազատների հետ հանդիպման եկած ՀՀ Մարդու իրավունքների պաշտպան Անահիտ Մանասյանը։
ՄԻՊ-ը, Շիրակի մարզպետ Մուշեղ Մուրադյանի հետ այցելելով Գյումրու ծայրամասային «Մուշ» թաղամասում գտնվող թիվ 23 միջնակարգ դպրոց, որն ամենաշատ աշակերտներ ունեցողներից է, շրջանավարտներին հետաքրքիր խորհուրդներ է տվել։
Կարդացեք նաև
«Աշխարհում կա մի հարստություն, որը կարելի է ձեռք բերել և երբևէ չկորցնել՝ գիտելիքն է։ Կրթության շնորհիվ կարելի է հասնել ամեն ինչի։ Արեք հնարավորինը լիարժեք գիտելիք և որակյալ կրթություն ստանալու համար ու նաև պահեք ու պահպանեք մարդկային կարևորագույն արժեքները, եղեք բարի, կյանքին տվեք բարին ու այն ձեզ կվերադառնա»,- ասել է Անահիտ Մանասյանը։
Ի դեպ, այս տարի դպրոցն ավարտում է նաև մարզպետի որդին․ նա Գյումրու թիվ 5 դպրոցի շրջանավարտ է։
Մուշեղ Մուրադյանը, շնորհավորելով շրջանավարտներին, խորհուրդ է տվել ճիշտ մասնագիտություն ընտրել, քանի որ դրանից է կախված երկրի վաղվա օրը։
Մարզպետը հույս է հայտնել, որ շրջանավարտները կլծվեն ամուր հայրենիք ունենալու սրբազան գործին։
Նունե ԱՐԵՎՇԱՏՅԱՆ
