Ստեղծված հանգամանքները թույլ են տալիս ակնկալել, որ, հնարավոր է, տեսանելի հեռանկարում խաղաղության պայմանագիր կնքվի Հայաստանի և Ադրբեջանի միջև, բայց կարևորը ոչ թե ժամանակն է, այլ բոլոր հարցերի վերջնական լուծումը: Այս մասին լրագրողների հետ զրույցում ասել է Ռուսաստանի նախագահի մամուլի քարտուղար Դմիտրի Պեսկովը:
Նա նշել է, որ Հայաստանի, Ադրբեջանի և Ռուսաստանի ներկայացուցիչները հաջորդ շաբաթվա վերջին կհավաքվեն Մոսկվայում՝ քննարկելու կողմերի միջև առկա հարցերը:
«Որևէ խնդիր չի դրվում ամեն ինչ ավարտին հասցնել, քանի որ կարևորը, իհարկե այնուամենայնիվ վերջնական արդյունքն է, բայց ոչ մեկը ժամանակի հետևից չի ընկել»,- ասել է Պեսկովը:
Կարդացեք նաև
Նրա խոսքով՝ հենց այդ նկատառումներից ելնելով էլ` հազիվ թե մեկը հիմա կարողանա հստակ կանխատեսել խաղաղության պայմանագրի հասնելու հստակ ժամկետները:
«Չնայած, ինչպես որ ասվեց երեկվա հանդիպմանը, հիմա շատ հարցերում հանգամանքները փոխվել են, և փաստացի, հայեցակարգային առումով այդ փոխված հանգամանքները թույլ կտան արդեն տեսանելի ապագայում հասնել խաղաղության պայմանագրի ստորագրման»,- ասել է Պեսկովը:
Նա հիշեցրել է, որ երեկ երեք երկրների ղեկավարները «հասել են պայմանավորվածությունների և հրահանգել, որպեսզի պրոֆիլային փոխվարչապետերը հանդիպեն հաջորդ շաբաթ»:
«Դա կլինի Մոսկվայում հաջորդ շաբաթվա վերջին, և կհղկվեն այն հարցերը, որոնց առումով կա սկզբունքային ըմբռնում, թե ինչպես դրանք լուծել, բայց նաև կարիք կլինի պայմանավորվել դետալների շուրջ»,- ասել է Պեսկովը:
Պատրաստեց Վիկտորյա ԱՆԴՐԵԱՍՅԱՆԸ
