Ազգային ժողովում Կենտրոնական բանկի գործունեության վերաբերյալ տարեկան հաղորդման ներկայացման ժամանակ ԿԲ նախագահի տեղակալ Արմեն Նուրբեկյանն անդրադարձավ դրամի արժեւորմանը եւ դոլարի արժեզրկմանը, այս համատեքստում՝ այն ոլորտներին, որոնք վնասներ են կրում։
«Փոխարժեքը տնտեսական իրողությունների հետեւանք է։ Օրինակ՝ անցած տարի մեզ մոտ փոխարժեքը պայմանավորված է եղել նրանով, որ մեծ ներհոսքի եւ մեծ արտահանման արդյունքում ունեցել ենք լուրջ արժեւորում։ Այսինքն՝ ՏՏ ոլորտի փոխարկումները եթե տեսնենք, կնկատենք, որ ՏՏ ոլորտը եղել է ամենաշատ դոլար փոխարկող ճյուղերից մեկը։ Բնականաբար, ես չեմ ժխտում, որ կլինեն ընկերություններ, որոնք խնդիրներ կունենան, բայց այդտեղ կառուցվածքային փոփոխություն ենք ունեցել։ Եվ քանի որ շատ ՏՏ ընկերություններ են գրանցվել Հայաստանի ոլորտում, դրա արդյունքում է մեզ մոտ դրամն արժեւորվել»,- ասաց նա։
Նուրբեկյանի խոսքով՝ եթե ԿԲ-ն արհեստականորեն միջամտի փոխարժեքի շուկային, գեներացնելու է գնաճ, որից տուժելու են ցածր եկամուտ ունեցող մարդիկ։ «Ես համաձայն եմ, որ կա անհավասար բաշխում, եւ որոշ ընկերություններ կունենան խնդիրներ, բայց միաժամանակ դրա այլընտրանքը կարող է շատ ավելի անդառնալի լինել, որովհետեւ մենք Հայաստանում կարող ենք զոհել ամբողջ գների կայունությունը, որը բոլորին է անդրադառնալու»,- հավելեց նա։
Ռոզա ՀՈՎՀԱՆՆԻՍՅԱՆ
